توماس باحتىڭ ورنىنا ح و ك باسشىسى لاۋازىمىنا كىمدەر ۇمىتكەر بولا الادى

استانا. KAZINFORM - الداعى ۋاقىتتا حالىقارالىق وليمپيادا كوميتەتىنىڭ (ح و ك) جاڭا پرەزيدەنتى سايلانادى. ءوز كەزەگىندە كوميتەتتىڭ قازىرگى باسشىسى توماس باح وسى قىزمەتتەن كەتەتىنىن راستادى.

بۇل تۇرعىدا ح و ك باسشىسى لاۋازىمىنا كىم كەلۋى مۇمكىن ەكەنىن جانە وسى جايىندا ساراپشىلار نە ايتىپ جاتقانىن كوپشىلىك نازارىنا ۇسىنۋدى ءجون كوردىك.

ازىرگە، توماس باحتىڭ ورنىن باساتىن ءبىر عانا ۇمىتكەر بەلگىلى، ياعني حالىقارالىق جەڭىل اتلەتيكا فەدەراتسيالارى قاۋىمداستىعىنىڭ باسشىسى سەباستيان كوۋدىڭ ەسىمى اتالىپ ءجۇر. ول 2025 -جىلعى ناۋرىزدا وتەتىن سايلاۋعا قاتىسۋ مۇمكىندىگىن قاراستىرىپ جاتقانىن اشىق ايتتى. بۇل تۋرالى Sport.kz جازادى. 

پاريج وليمپياداسى جابىلار الدىندا جۋرناليستەر سەباستيان كوۋدان ناۋرىزداعى سايلاۋعا قاتىسۋ مۇمكىندىگى تۋرالى سۇرادى. ءوز كەزەگىندە ول «ەگەر اتالعان لاۋازىمعا سايلانۋعا ءتيىستى مۇمكىندىك بولسا، ونى مىندەتتى تۇردە قاراستىراتىنىن» اتاپ ءوتتى. ال BBC جانە The Guardian سياقتى بريتاندىق ب ا ق ونىڭ مالىمدەمەسىن ح و ك ءتوراعالىعىنا باسەكەگە تۇسۋگە دايىن ەكەندىگىنىڭ «ايقىن بەلگىسى» دەپ جاريالاپ جاتىر.

اتاپ ايتقاندا، سەباستيان كوۋ بۇعان دەيىن وسىنداي مالىمدەمەلەرىن جاساپ جۇرگەن ەدى. بۇعان قوسا، بيىلعى وليمپيادا كەزىندە دە ول الجيرلىك جانە تايۆاندىق سپورتشىلار يمان حەليف پەن لين يۋتينگتىڭ بوكس تۋرنيرىنە قاتىسۋ ماسەلەسىن شەشۋگە قاتىستى ح و ك-تىڭ كوزقاراسىنا كوڭىلى تولمايتىنىن اشىق ايتتى. بۇل سپورتشىلاردى حالىقارالىق بوكس قاۋىمداستىعى (IBA) گەندەرلىك تەستىلەر نەگىزىندە جارىستاردان شەتتەتكەن ەدى. ەكەۋى دە پاريجدە التىن مەدال جەڭىپ الدى. كوۋدىڭ پايىمىنشا، ولارعا قاتىستى ح و ك-تىڭ ساياساتى «ناقتى ءارى تۇسىنىكتى» بولۋى ءتيىس.

سەباستيان كوۋ ح و ك باسشىسى لاۋازىمىنا داۋىس بەرۋ ناۋقانى تۋرالى ايتا كەلە، 2025 -جىلعى سايلاۋدا باسەكەلەستىك وتە جوعارى بولاتىنىن ءسوز ەتتى.

ساراپشىلاردىڭ جازۋىنشا، توماس باحتىڭ ورنىن باساتىن ۇمىتكەرلەردىڭ قاتارىنا ح و ك ۆيتسە-پرەزيدەنتتەرى نيكول حۋۆەرتس پەن حۋان انتونيو كىشى سامارانچتى، سونداي-اق ۇيىمنىڭ سپورتشىلار كوميسسياسىن باسقارىپ جۇرگەن كيرستي كوۆەنتري ەنىپ وتىر.

ايتا كەتەيىك، نيكول حۋۆەرتس (ارۋبا) سينحروندى ءجۇزۋ سپورتشىسى رەتىندە تانىمال. نيكول 2006 -جىلدان بەرى حالىقارالىق وليمپيادا كوميتەتىنىڭ مۇشەسى جانە قازىر ح و ك اتقارۋشى كوميتەتىنىڭ مۇشەسى. 2021 -جىلدىڭ شىلدەسىندە ول ح و ك ۆيتسە-پرەزيدەنتى رەتىندە سايلاندى.

حۋان انتونيو كىشى سامارانچ (1959 -جىلى 1-قاراشادا تۋعان) - يسپاندىق سپورت قايراتكەرى جانە حالىقارالىق وليمپيادا قوزعالىسىنىڭ قايراتكەرى. ول 2001 -جىلدان بەرى حالىقارالىق وليمپيادا كوميتەتىنىڭ مۇشەسى.

ح و ك باسشىسى لاۋازىمىنا ۇمىتكەر كيرستي لي كوۆەنتري سيۋارد - زيمبابۆەلىك ءجۇزۋشى ءارى ساياساتكەر، حالىقارالىق وليمپيادالىق قوزعالىستىڭ قايراتكەرى، ەكى دۇركىن وليمپيادا چەمپيونى، بىرنەشە رەت الەمدىك رەكورد ورناتقان.

فرانسۋزدىق L'Equipe باسىلىمىنىڭ جازۋىنشا، اتالعان سايلاۋعا فرانسيانىڭ ۇلتتىق وليمپيادا كوميتەتى مەن حالىقارالىق ۆەلوسيپەدشىلەر وداعىنىڭ (UCI) پرەزيدەنتى داۆيد لاپارتيان دا قاتىسۋى مۇمكىن.

داۆيد لاپارتيان 1973 -جىلى دۇنيەگە كەلگەن. 2005 -جىلى ول حالىقارالىق ۆەلوسيپەدشىلەر وداعىنىڭ (UCI) باسقارۋ كوميتەتىنە سايلاندى. 2009 -جىلى اقپاندا فرانسيا ۆەلوسپورت فەدەراتسياسىنىڭ پرەزيدەنتى بولدى، ال 2013 -جىلى 23-اقپاندا وسى لاۋازىمعا قايتا سايلاندى. 2013 -جىلدىڭ ناۋرىزىندا ول ەۋروپا ۆەلوسپورت وداعىنىڭ پرەزيدەنتى رەتىندە بەكىتىلسە، سول جىلدىڭ 28-قىركۇيەگىندە حالىقارالىق ۆەلوسيپەدشىلەر وداعىنىڭ ۆيتسە-پرەزيدەنتى بولدى. 2021 -جىلى ول جاڭا ءتورت جىلدىق مەرزىمگە UCI پرەزيدەنتى بولىپ سايلانادى.

ەسكە سالايىق، توماس باح حالىقارالىق وليمپيادا كوميتەتىن 2013 -جىلدىڭ كۇزىنەن بەرى باسقارىپ كەلەدى. 2021 -جىلى ول ءتورت جىلدىق مەرزىمگە قايتا بەكىتىلدى، ياعني وليمپيادا حارتياسىنىڭ ەرەجەلەرىنە سايكەس وسى لاۋازىمعا سوڭعى رەت سايلاندى. ت. باحتىڭ ءوزى ح و ك اتقارۋشى كوميتەتىنەن ۇيىم باسشىسىن سايلاۋدى 2025 -جىلدىڭ 26-ناۋرىزىنا بەلگىلەۋدى سۇراعان. جاڭا پرەزيدەنت قىزمەتىنە كەلەسى جىلدىڭ 24-ماۋسىمىندا كىرىسەدى.

اۆتور
رۋسلان عابباسوۆ