تولەم كولەمى ۇلعاياتىن بولادى - ەرلان قارين «ۇلتتىق قور - بالالارعا» جوباسى جايلى

استانا. KAZINFORM – ق ر مەملەكەتتىك كەڭەسشىسى ەرلان قارين الداعى ۋاقىتتا «ۇلتتىق قور - بالالارعا» جوباسى اياسىندا جاسالاتىن تولەم كولەمى ۇلعاياتىنىن جازدى.

«مەملەكەت باسشىسىنىڭ باستامالارى بىرتىندەپ ورىندالىپ جاتىر.

قاسىم-جومارت توقايەۆتىڭ سايلاۋ الدىنداعى باعدارلاماسىندا ايتىلعان نەگىزگى باستامانىڭ ءبىرى - «ۇلتتىق قور - بالالارعا» جوباسى ءىس جۇزىندە جۇزەگە اسىرىلىپ، بالالارىمىزدىڭ ەسەپ-شوتىنا ۇلتتىق قوردان تولەمدەر تۇسە باستادى.

قاراجاتتىڭ تولەنۋ تاسىلدەرى تۋرالى ۇكىمەت پەن ءبىرىڭعاي جيناقتاۋشى زەينەتاقى قورىنىڭ وكىلدەرى ەگجەي-تەگجەي ءتۇسىندىردى. الداعى ۋاقىتتا بولىنەتىن تولەم ۇلتتىق قور اكتيۆتەرىنىڭ ەسەلەنۋىنە جانە قوسىمشا ينۆەستيتسيالىق تابىستىڭ ارتۋىنا بايلانىستى ۇلعاياتىن بولادى»، - دەپ جازدى ەرلان قارين تەلەگرام ارناسىندا.

سونداي-اق، مەملەكەتتىك كەڭەسشى ءماجىلىس كەشە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى زاڭ جوباسىن جۇمىسقا قابىلداعانىن مالىمدەدى. بۇل قۇجاتتى دەپۋتاتتار تۇرمىستىق زورلىق-زومبىلىق جانە پەدوفيليا ءۇشىن جاۋاپكەرشىلىكتى كۇشەيتۋ تۋرالى مەملەكەت باسشىسىنىڭ باستاماسىنا سايكەس ازىرلەگەن بولاتىن.