توكيودا ەر ادام بيلىك پارتياسىنىڭ شتاب-پاتەرىنە مولوتوۆ كوكتەيلىن لاقتىردى

استانا. قازاقپارات - 49 جاستاعى ەر ادام جاپونيانىڭ ليبەرالدى-دەموكراتيالىق پارتياسىنىڭ شتاب-پاتەرىنە بىرنەشە بوتەلكە ورتەگىش سۇيىق لاقتىردى، دەپ جازادى BBC.

NHK تەلەارناسىنىڭ حابارلاۋىنشا، ەر ادام ميكرواۆتوبۋستان ءتۇسىپ، عيماراتقا قاراي بەس-التى بوتەلكە مولوتوۆ كوكتەيلىن لاقتىرعان. ەشكىم زارداپ شەككەن جوق، بوتەلكەلەردىڭ ءبىرى پوليتسيا كولىگىنە تيگەن.

وسىدان كەيىن ەر ادام پرەمەر- مينيستر رەزيدەنتسياسىنىڭ قورشاۋىن جۇلقىلاپ، ءتۇتىندى زات لاقتىرعان. پوليتسيا ونى ۇستاپ، ارەكەتىنىڭ سەبەبىن انىقتاپ جاتىر.

بيلىك پارتياسىنىڭ شتاب- پاتەرىنە شابۋىل 27-قازانعا بەلگىلەنگەن پارلامەنتتىك سايلاۋعا سەگىز كۇن قالعاندا جاسالعان. سايلاۋ ليبەرالدى-دەموكراتيالىق پارتياداعى جەمقورلىققا بايلانىستى جانجال مەن پارتيا جەتەكشىسىنىڭ اۋىسۋىنا بايلانىستى مەرزىمىنەن بۇرىن وتەدى.

وسىعان دەيىن جاپونيانىڭ ۇزاق جاسايتىندار سانى جاعىنان رەكوردتى جاڭارتقانىن جازدىق.