توڭدىم. ەكى اۆتوبۋس الماي كەتتى: تالدىقورعاندا قوعامدىق كولىكتەر وقۋشىلارعا توقتامايتىن بولعان

تالدىقورعان. KAZINFORM - الەۋمەتتىك جەلىگە اۆتوبۋس الماي كەتىپ، جىلاپ تۇرعان وقۋشىنىڭ جازباسى جاريالاندى. تالدىقورعاندىق جەلى قولدانۋشىلارى نارازىلىعىن ءبىلدىردى.

وقۋ جىلى باستالعالى مۇنداي جازبالار جەلى بەتىنە ءجيى جاريالاناتىن بولدى. قالا ىشىندە جۇرەتىن قوعامدىق كولىكتەردىڭ كەيبىرى ايالدامادا تۇرعان بالالارعا توقتامايدى. ونىڭ سەبەبىن اتا-انالار تالدىقورعان قالاسى بويىنشا وقۋشىلار تەگىن «وڭاي» كارتاسىن پايدالانۋىمەن بايلانىستىرادى.

«مەنىڭ مەكتەپ جاسىندا ءۇش بالام بار. كەيدە ۇيگە كەشىگىپ كەلەدى. قايدا جۇرگەنىن سۇراسام، اۆتوبۋستار توقتامايتىنىن ايتادى. راس، ول. ۇلكەندەر بىرگە تۇرساق توقتايدى، ايالدامادا وزدەرى عانا بولسا، الماي كەتەدى. سەبەبى ولار اقشا تولەمەيدى عوي. قىس باستالدى، مىنە كۇن سۋىتتى. قاراڭعى ەرتە تۇسەدى. اۆتوبۋستاعىلار ەندى ولاي جاسامايتىن شىعار» - دەدى، تالدىقورعان قالاسىنىڭ تۇرعىنى جانار سكينديروۆا.

الەۋمەتتىك جەلىدە جاريالانعان جازبانى تۇسىرگەن قالا تۇرعىنى وقۋشىنى «جۇلدىز» شاعىن اۋدانى جاقتاعى ايالادامادا كەزىكتىرگەن. جىلاپ تۇرعانىن بايقاپ، ءمان-جايدى سۇراعان. بالا 2 اۆتوبۋستىڭ توقتاماي كەتكەنىن، سۋىقتا قاتتى توڭعانىن ايتقان.

جازبا استىنا پىكىر قالدىرعان 400-دەن اسا جەلى قولدانۋشى تالدىقورعاندا مۇنداي جاعدايدىڭ كۇندە كۋاسى بولاتىندارىن جازدى.

ەسكە سالايىق بۇعان دەيىن تالدىقورعاندا اۆتوبۋسقا ورناتىلعان بەينەكامەرا جول ەرەجەسىن بۇزعان كولىكتەردى ءتۇسىرىپ الاتىنىن جازعانبىز.

اۆتور
ايبەك قۇتتىبەك