توعىز بالانىڭ اناسى 20 جىلدان اسا ۋاقىت بويى ازاماتتىق الا الماي جۇرگەن
استانا. قازاقپارات - شىمكەنتتىك ايەل 23 جىلدان كەيىن قازاقستان ازاماتتىعىن الدى، - دەپ حابارلايدى Polisia.kz.
شىمكەنتتىڭ 39 جاستاعى تۇرعىنى ناتاليا - رەسەي فەدەراتسياسىنىڭ تۋماسى. ول 1998 -جىلى اناسىمەن بىرگە قازاقستانعا كەلگەن. الايدا 16 جاسقا تولعاننان كەيىن تۇراقتى تىركەلگەن جەرى بولماۋىنا بايلانىستى قۇجاتتاردى ۋاقىتىلى الا الماعان.
كەيىن ناتاليا قازاقستان ازاماتىمەن رەسمي تۇردە نەكەگە وتىرعان.
«بۇل وعان جەڭىلدەتىلگەن تارتىپپەن ازاماتتىق الۋعا ءوتىنىش بەرۋگە مۇمكىندىك سىيلادى. تۇرمىستاعى ايەلدەردىڭ ازاماتتىعى تۋرالى كونۆەنتسياعا جانە «قازاقستان رەسپۋبليكاسىنىڭ ازاماتتىعى تۋرالى» زاڭعا سايكەس 2024 -جىلى ول ازاماتتىق، جەكە كۋالىك الدى»، - دەپ جازىلعان حابارلامادا.
ناتاليا كۇيەۋىمەن بىرگە توعىز بالا تاربيەلەپ وتىر. قازىر كوپبالالى انانىڭ قۇجاتتارى راسىمدەلگەن.