توپان سۋ باسقان الەۋمەتتىك نىساندار قالپىنا كەلتىرىلىپ جاتىر

استانا. KAZINFORM — كوكتەمدە سۋ باسقان وڭىرلەردە 67 الەۋمەتتىك نىسان زارداپ شەككەن. تولىعىراق ونەركاسىپ جانە قۇرىلىس مينيسترلىگىنىڭ اقپاراتىندا.

«تاسقىن سۋ باسقان وڭىرلەر اكىمدىكتەرىنىڭ اقپاراتى بويىنشا، 67 الەۋمەتتىك نىسان زارداپ شەكتى. ونىڭ ىشىندە، 5 دەنساۋلىق ساقتاۋ مەكەمەسى، 39 ءبىلىم نىسانى، 8 مادەنيەت مەكەمەسى، 9 سپورت نىسانى جانە 6 اكىمشىلىك عيمارات بار. ونىڭ ىشىندە اقتوبە وبلىسىندا 3 نىسان سۋ استىندا قالدى. تەحنيكالىق تەكسەرۋ ناتيجەسى بويىنشا 23 نىسان قايتا سالىنادى جانە 19 نىسانعا كاپيتالدى، ال 25 عيماراتقا اعىمداعى جوندەۋ جۇمىستارى جۇرگىزىلەدى»، — دەلىنگەن مينيسترلىكتىڭ اگەنتتىك جولداعان ساۋالدىڭ جاۋابىندا.

ۆەدومستۆونىڭ اقپاراتىنا سۇيەنسەك، قۇرىلىس جۇمىستارىنا 100 دەن استام مەردىگەرلىك ۇيىم، ونىڭ ىشىندە 3500 گە جۋىق جۇمىس كۇشى جانە 600 گە جۋىق تەحنيكا تارتىلعان.

سونداي-اق، مينيسترلىكتەن ۇيلەردىڭ قۇرىلىسىنا ەلىمىزدە وندىرىلگەن، ساپا باقىلاۋىنان جانە ءتيىستى سەرتيفيكاتتاۋدان وتكەن ماتەريالداردىڭ قولدانىلىپ جاتقانى ءمالىم ەتىلدى.

«بۇگىندە سولتۇستىك قازاقستان وبلىسىندا 53 تۇرعىن ءۇيدىڭ قۇرىلىسى ءبىتىپ، تۇرعىندارعا كىلت تابىس ەتىلدى. ودان بولەك، ءۇيىن باسقان ازاماتتارعا 2276 تۇرعىن ءۇي ساتىپ الىندى»، — دەيدى مينيسترلىكتەن.