تۋريزمدى دامىتام دەسەڭ اجەتحانا سال: مينيسترلىك ماسەلەنى قاشان شەشەدى

استانا. KAZINFORM - بۇگىن ۇكىمەت وتىرىسىندا وتاندىق تۋريزمدى دامىتۋ جانە سيفرلاندىرۋ ماسەلەسى قارالدى. جيىننان كەيىن ب ا ق وكىلدەرى اۆتوجولدار بويىن جانە دالالىق جەرلەردى اجەتحانامەن قامتۋ ماسەلەسىن كوتەردى.

- تۋريستىك باعىتتار بويىنداعى اجەتحانا تاپشىلىعى بار، بۇگىندە 493 اجەتحانا قاجەت بولعان. ونىڭ كوبى ياعني 300-دەن استامى بۇگىندە جول بويىندا سالىندى. بۇل 2021 -جىلى «Kazakh Tourism» ۇلتتىق كومپانياسى جۇرگىزگەن اۋديت بارىسىندا انىقتالعان تاپشىلىق، كومپانيا ەلدى ارالاپ، وسى دەفيتسيتتى انىقتادى. ودان بولەك، جەرگىلىكتى اتقارۋشى ورگاندار تاراپىنان دا سانيتارلىق-گيگيەنالىق توراپتار مەن جول بويىنداعى قىزمەت كورسەتۋ نىساندارى سالىنىپ جاتىر. ولاردىڭ سانى بىرنەشە جۇزگە جەتەدى. اتالعان نىساندار ۇلتتىق پاركتەر اۋماعى مەن ينجەنەرلىك ينفراقۇرىلىم جەتپەگەن شالعاي ايماقتاردا دا بوي كوتەرىپ جاتىر. ولار جاڭا تەحنولوگيامەن جۇمىس ىستەيدى. ماسەلەن، الماتىلىق ۇلتتىق پارك اۋماعىندا فرانسۋز تەحنولوگياسىمەن جابدىقتالعان نىساندار ورناتىلعان، - دەپ جاۋاپ بەردى تۋريزم جانە سپورت ۆيتسە- ءمينيسترى ەرجان ەركىنبايەۆ جۋرناليستەردىڭ ساۋالىنا.

وسى ورايدا ۆيتسە-مينيستر قولجەتىمدى اجەتحانا ماسەلەسىن شەشۋدە كولىك مينيسترلىگىنىڭ دە ءبىراز جۇمىس ىستەگەنىن ايتىپ وتىر.

- ۆەدومستۆو بىزبەن بىرلەسىپ، رەسپۋبليكالىق ماڭىزى بار اۆتوجولدار بويىندا 1400-دەن استام جول بويىنداعى سەرۆيستىك نىسانداردى ۇلتتىق ستاندارتقا ساي كەلتىردى، وسىلايشا بۇگىندە ولاردىڭ �- ى وسى ستاندارتقا سايكەس. جىل سايىن تۋريستىك يميدجگە كەرى اسەر ەتەتىن شامامەن 100-گە جۋىق ەسكى اجەتحانا الىنىپ تاستالادى. كولىك مينيسترلىگى جەلىسى بويىنشا جىل سايىن 50-100 جاڭا سانيتارلىق نىسان سالىنادى. جىل سوڭىنا دەيىن سانيتارلىق-گيگيەنالىق توراپتارى بار تاعى 25 جول بويى سەرۆيس نىسانىن سالۋ جوسپارلانىپ وتىر، - دەيدى ول.

ونىڭ ايتۋىنشا، اتالعان سەرۆيس تۇرىمەن اينالىساتىن جەكە كاسىپكەرلەرگە ءاربىر سانيتارلىق توراپ ءۇشىن اي سايىن 83 مىڭ تەڭگە مولشەرىندە قولداۋ وتەماقىسى تولەنەدى.

- ماسەلە شەشىلىپ جاتىر. ارينە، ەلىمىز كەڭ بايتاق، ءبىر جىلدىڭ ىشىندە بۇكىل جول بويىنداعى ينفراقۇرىلىم مەن سانيتارلىق توراپ ماسەلەسىن تولىق شەشۋ مۇمكىن ەمەس. بۇل كەيبىر اۋماعى شاعىن ەلدەردە عانا مۇمكىن شىعار. ءبىراق، ءبىز دۇرىس باعىتتا كەلەمىز، جولدار بويىنشا ماسەلە شەشىلدى، جول بويىنداعى قىزمەت كورسەتۋ نىساندارى دا رەتتەلىپ قالدى. ەندىگى كەزەكتە سانيتارلىق-گيگيەنالىق توراپتار ماسەلەسى دە شەشىلەدى دەپ ويلايمىن. بۇگىندە كوپتەگەن ايماقتا، اسىرەسە تۋريزمدى دامىتۋعا ناقتى جوسپار بار جەرلەردە، زاماناۋي تالاپتارعا ساي جاعدايلار جاسالعان. ال ەگەر سانيتارلىق-گيگيەنالىق توراپتار تۋرالى ايتاتىن بولساق، ولاردى سالۋ، جەرگىلىكتى اتقارۋشى ورگانداردىڭ مىندەتى. ءبىز، ارينە، باقىلاپ، ينسپەكسيا جاساپ، قاي جەردە جەتىسپەيتىنىن، قاي جەردە ءتۇرلى سەبەپتەرمەن جابىق تۇرعانىن كورسەتىپ وتىرامىز. كەيدە سۋ ءوشىپ قالادى، كەيدە قىزمەتكەر جۇمىسقا شىقپايدى. بارلىق اجەتحانانىڭ جاعدايىن تۋريزم مينيسترلىگى جەكە ءوزى قاداعالاي المايدى. دەگەنمەن، جۇمىس جۇرگىزىلىپ جاتىر، ديناميكا بار، - دەپ قورىتىندىلادى ەرجان ەركىنبايەۆ.

بۇعان دەيىن ەلىمىزدە گيد ماماندارىن دايارلاۋى مۇمكىن ەكەندىگى تۋرالى حابارلاعان ەدىك.

ودان بولەك، تۋريزم جانە سپورت ءمينيسترى ەلىمىزگە كەلىپ الدانىپ قالاتىن شەتەلدىك تۋريستەر ماسەلەسىن شەشۋ جولدارىن اتادى.

ايتا كەتەيىك، ەلىمىزدە تۋريستەرگە ارنالعان، جاساندى ينتەللەكتىگە نەگىزدەلگەن TravelStan موبيلدى قوسىمشا ازىرلەنەدى.

اۆتور

داۋلەت ىزتىلەۋ