تۋريزم جانە سپورت ءمينيسترى قازاق بوكسشىلارىنىڭ كەمشىن تۇستارىن ايتتى

مەملەكەت باسشىسىنىڭ تاپسىرماسىنا سايكەس، تۋريزم جانە سپورت ءمينيسترى ەرمەك مارجىقپايەۆ قىتايدا وتكەن ازيا ويىندارىنىڭ قورىتىندىسى بويىنشا فەدەراتسيالاردىڭ ەسەبىن تىڭداۋدى جالعاستىرىپ جاتىر.

بۇل جولى ەلىمىزدەگى ەڭ تانىمال سپورت تۇرلەرى سانالاتىن بوكس پەن دزيۋدو فەدەراتسياسىنىڭ وكىلدەرى ەسەپ بەردى.

جيىندا ولار سپورتشىلاردىڭ حاڭجوۋداعى ونەرى تۋرالى ايتىپ، تومەن ناتيجە كورسەتۋىنىڭ سەبەپتەرىن باياندادى. ەرمەك مارجىقپايەۆ قازاقستاندىق بوكسشىلاردىڭ فيزيكالىق جانە فۋنكتسيونالدى دايىندىعىندا كەم تۇستار كوپ ەكەنىن، ايەلدەر بوكسىندا رەزەرۆتىڭ جوقتىعىن اتاپ ءوتتى.

ءبارىمىز كارينا يبراگيموۆانىڭ (57 كەلى) فينالداعى، اسلانبەك شىمبەرگەنوۆتىڭ (71 كەلى) جارتىلاي فينالدىق جەكپە-جەگىندە بولعان جاعداي تۋرالى جاقسى بىلەمىز. الايدا، بۇل كوماندانىڭ جالپى كورسەتكەن ناتيجەسىنە سەبەپ بولماۋعا ءتيىس. ءبىزدىڭ بوكسشىلار ەكىنشى راۋندتان كەيىن شارشاپ قالىپ جاتىر. فەدەراتسيانىڭ ۇسىنىسىمەن سپورتشىلاردىڭ فيزيكالىق دايىندىعىن جاقسارتۋ ماقساتىندا شەتەلدىك كەڭەسشى شاقىرىلعانىمەن، ناتيجە كوڭىلدەگىدەي بولماي شىقتى. ايەلدەر بوكسىندا رەزەرۆ جوق، ءبىر سپورتشى بارلىق تۋرنيرگە قاتىسىپ شىعادى»، - دەدى تۋريزم جانە سپورت ءمينيسترى.

سونىمەن قاتار ەرمەك مارجىقپايەۆ دزيۋدو فەدەراتسياسىنىڭ ەسەبىن تىڭداپ، ازيا ويىندارىندا جاقىن كورشىلەرىمىزدەن مەدال سانى بويىنشا دا، جەكە بەلدەسۋلەر بويىنشا دا قالىپ قويعانىنا توقتالدى.

ايتا كەتەيىك، بۇل كۇندەرى بوكستان استانا قالاسىندا 4 جىلدا ءبىر رەت وتەتىن ەرلەر اراسىنداعى سپارتاكيادا تۋرنيرى وتۋدە. وعان ەلىمىزدىڭ كىل مىقتى بوكسشىلارى قاتىسىپ، باق سىناۋدا.