ۇيىمداستىرۋشىلاردىڭ ايتۋىنشا، مۇنداي جوبالار ەكولوگيالىق ماسەلەلەردى ناسيحاتتاپ قانا قويماي، وتاندىق ونەر كەڭىستىگىندە جاڭا باعىتتاردىڭ دامۋىنا ىقپال ەتەدى.
كرەاتيۆ حابتىڭ نەگىزىن قالاۋشى توعجان قۇرمانجانوۆانىڭ سوزىنشە، قازاقستاندا مۇسىنشىلەردىڭ سانى از، ال تۇرمىستىق قالدىقتاردان ونەر تۋىندىلارىن جاساۋ جاڭا باعىت سانالادى. بۇل جۇمىستار ەكولوگياعا دەگەن كوزقاراستى وزگەرتىپ، ءتىپتى بالالاردىڭ قىزىعۋشىلىعىن ارتتىرادى.
كورمەنىڭ نەگىزگى يدەياسى - شامادان تىس تۇتىنۋدىڭ قورشاعان ورتاعا تيگىزەتىن تەرىس اسەرىن كورسەتۋ. قانات ءابديننىڭ تۋىندىلارىندا تۇرمىستىق قالدىقتار جاڭا بەينەلەر مەن گيبريدتەرگە اينالعان.
اۆتوردىڭ پىكىرىنشە، بۇل تۋىندىلار بولاشاقتا ساناسىز ادام بەينەسىن بىلدىرەدى. ەگەر تابيعي رەسۋرستاردى پايدالانۋ مەن قورشاعان ورتانى لاستاۋدى جالعاستىرساق، قوقىس ادام دەنەسىن ساڭىراۋقۇلاق ءتارىزدى جارىپ شىعۋى مۇمكىن.
كورمەدەگى بارلىق ءمۇسىن ايەل بەينەسىندە جاسالىپ، ءارقايسىسىنا جەكە ەسىم بەرىلگەن. بۇل ايەل تابيعاتىنا ءتان نازىكتىك، اسەمدىك جانە تىلسىم قاسيەتتەردى كورسەتۋ ماقساتىندا جاسالعان. ءمۇسىنشى وسى ەرەكشە پىشىندەر ارقىلى كورەرمەننىڭ ەكولوگيالىق ساناسىن وياتىپ، ورىنسىز تۇتىنۋدىڭ سالدارىن ءتۇسىندىرۋدى كوزدەيدى.
بۇدان بۇرىن ەلوردادا قازاقستان حالقىنىڭ مادەنيەتىنە ارنالعان كورمە ۇيىمداستىرىلعانىن جازعانبىز.