تۇرىكمەنستان «توزاق قاقپاسىنداعى» ءورتتى سوندىرمەك

استانا. KAZINFORM - تۇرىكمەنستان اربازا كراتەرىندەگى ءورتتى باسەڭدەتۋدە ۇلكەن جەتىستىككە جەتتى. بۇل تۋرالى Bugin.kz ءتىلشىسى «تۇرىكمەن گاز» مەملەكەتتىك كونسەرنىنىڭ تابيعي گاز عىلىمي-زەرتتەۋ ينستيتۋتىنا سىلتەمە جاساپ حابارلايدى.

حالىق اراسىندا «توزاق قاقپاسى» دەپ اتالاتىن كراتەردە ۇلكەن ءورت وسىدان 53 جىل بۇرىن تۇتانعان. ونى ءسوندىرۋدىڭ جولى ءالى كۇنگە دەيىن تابىلعان جوق.

زەرتحانا مەڭگەرۋشىسى يرينا لۋريەۆانىڭ ايتۋىنشا، عىلىمي-زەرتتەۋ ينستيتۋتىندا جاسالعان ءوشىرۋ ءادىسى كراتەردەگى گاز اعىنىن ازايتا العان. ول:

«ناتيجەسىندە بۇل ءادىس كراتەرگە قاراي قوزعالاتىن گاز اعىنىنىڭ تومەندەۋىنە اكەلدى. وسى گازدىڭ بارلىعىن شىعارامىز، گاز بار قور ۇڭعىمالارىنا جىبەرىلەدى»، - دەدى .

يرينا كراتەردى تولىعىمەن سوندىرۋگە قانشا ۋاقىت كەتەتىنىن ناقتىلامادى، ءبىراق بۇل ءادىس قازىردىڭ وزىندە كراتەردەن مەتان شىعارىندىلارىن «ايتارلىقتاي» ازايتقان.

عىلىمي-زەرتتەۋ ينستيتۋتىنىڭ عالىمدارى ورتەنىپ جاتقان كراتەردى ءسوندىرۋدىڭ بىردەن-ءبىر جولى - گاز كەنىشى ماڭىنداعى ۇڭعىمانى بۇرعىلاۋ دەگەن قورىتىندىعا كەلدى.

اشحابادتان 266 شاقىرىم جەردە ورنالاسقان قاراقۇم شولىندەگى گاز كراتەرى 1971 -جىلى بارلاۋ كەنىشىنىڭ قيراۋى ناتيجەسىندە پايدا بولعان. كەيىن ديامەترى - 60 مەتر، تەرەڭدىگى - 20 مەتر شۇڭقىردى حالىق اراسىندا «توزاق قاقپاسى» دەپ اتاعان. كراتەردىڭ استىنداعى ۇڭگىردەن شىققان جانە گازدىڭ جانۋىنان شىققان وت باعانالارى 15 مەتر بيىكتىككە جەتۋى مۇمكىن.