تۇرىك وتباسى اۆتوبۋسپەن انكارادان استاناعا كوشپەندىلەر ويىنىنا كەلە جاتىر
انكارا. KAZINFORM - ەرلى-زايىپتىلار قولدان ۇيگە اينالدىرعان جەكە اۆتوبۋسىمەن دۇنيەجۇزىلىك كوشپەندىلەر ويىنىن تاماشالاۋ ءۇشىن انكارادان استاناعا جولعا شىقتى، دەپ جازادى انادولى.
1982 -جىلعى كونە اۆتوبۋسقا مىنگەن يديل مەن بۋراك دۋران ەكى جاسار ۇلىمەن بىرگە 8-13-قىركۇيەكتە قازاقستاندا وتەتىن V دۇنيەجۇزىلىك كوشپەندىلەر ويىنىنا بارا جاتىر.
كلينيكالىق پسيحولوگ يديل دۋران مەن اعاش ۇستاسى بۋراك دۋران ەكى جاسار ۇلى گۇنەش كۋتلۋ حانمەن بىرگە ىستانبۇلداعى كۇندەلىكتى تىرشىلىگىن ۋاقىتشا تاستاپ، 9 ايدان بەرى «كوشپەندى» دەپ اتالاتىن اۆتوبۋستا ءومىر ءسۇرىپ كەلەدى.
1982 -جىلى شىققان جولاۋشىلار اۆتوبۋسىن ترەيلەرگە اينالدىرعان دۋران وتباسى «ول قاي جاق» دەپ اتالاتىن الەۋمەتتىك جەلىدەگى پاراقشاسىندا كۇندەلىكتى ءومىرى مەن ساياحاتىنان سىر شەرتەدى.
ساپارىن ەل استاناسى انكارادان باستاعان دۋراندار استاناعا دەيىن 5400 شاقىرىم جولدى ءجۇرىپ ءوتۋى كەرەك.
انادولى اگەنتتىگىنىڭ تىلشىسىنە بۋراك دۋران اۆتوبۋستان كەرۋەن جاساپ، ونى باسپاناعا اينالدىرعانىن جانە بۇل شىتىرمان وقيعانىڭ ءۇش جىلعا سوزىلعانىن ايتادى.
«كوشپەندىلەر ويىنىنىڭ بيىل قازاقستاندا وتەتىنىن ەستىپ، نەگە «كوشپەندى» دەپ اتالاتىن اۆتوبۋسىمىزبەن الىس ساياحاتقا شىقپاسقا دەگەن ويعا كەلدىك. راس، الدىمىزدا ۇزاق جول بار. بۇل ويىمىزدى ەستىگەندەردىڭ ءبارى «جىندىسىڭدار ما؟» دەپ جاتىر. 5 مىڭ 400 شاقىرىمدى ءجۇرىپ ءوتۋ وڭاي ەمەس. كولىگىمىزدە ونى-مۇنى كەم-كەتىك بولدى، جولعا شىعار الدىندا ءبارىن جوندەپ الدىق. جوندەپ جاتقان مەحانيك شەبەرلەر دە قازاقستانعا باراتىنىمىزدى ەستىگەندە تاڭ-تاماشا بولدى»، - دەيدى بۋراك دۋران.
يديل دۋراننىڭ ايتۋىنشا، ولار تۇركيادان گرۋزياعا، ودان كەيىن رەسەيگە ءوتىپ، تاتارستان ارقىلى قازاقستانعا جەتپەك.
«ۇلىمىزبەن بىرگە بۇكىل ورتالىق ازيانى ارالايمىز. وسى تۇستا كوزىمە جاس كەلىپ، ءبىراز تولقىپ تۇرمىن. ويتكەنى مەنىڭ شىققان جەرىم - ورتالىق ازيا»، - دەيدى يديل.
يديل دۋران اۆتوبۋستى كەرۋەنگە اينالدىرۋ پروتسەسىن جانە ءوز ومىرىندەگى وزگەرىستەردى بىلاي اڭگىمەلەيدى:
«بۇل ماشاقات ءۇش جىلعا سوزىلدى، ءبىراق سوعان تاتيدى. ءبىز ىستانبۇلداعى ءۇيدى كىلتتەدىك تە، ترەيلەرگە كوشتىك. بۇرىن دا ءبىراز ساياحاتتاپ، كەمپكە باراتىن دەمالۋشى دا، جاياۋ تۋريست تە بولىپ ۇلگەرگەنبىز. الايدا قازىر الدەقايدا ىڭعايلى - ۇيىمىزدەن شىقپاي-اق ەلىمىزدى ارالاپ ءجۇرمىز. ەكى جاسار ۇلىمىز ءارقاشان بىزبەن بىرگەن. وسىلايشا ءبىز وعان ەلىمىزدىڭ سۇلۋلىعىن، جەر-جەردەگى مادەنيەتتى كورسەتىپ، حالىقپەن قويان-قولتىق ارالاستىرىپ، قىزىق ءارى تاربيەلىك ءمانى زور ومىرمەن تانىستىرىپ جاتىرمىز. ترەيلەرمەن ساياحاتتاۋ - شىنىمەن دە تاماشا جايلىلىق سىيلايدى. توعىز ايدان بەرى سىرتتا ءجۇرمىز، قازىر پاتەرگە كىرگەندە ءبىرتۇرلى وكپەمىز قىسىلىپ، سىيماي كەتەمىز. بۇل ءبىزدىڭ بالامىز دا وسىلاي ەركىن بولىپ ەرجەتەدى دەگەن ءۇمىت بەرەدى».
ەسكە سالا كەتەيىك، استانادا وتەتىن دۇنيەجۇزىلىك كوشپەندىلەر ويىنىنىڭ باستالۋىنا 12 كۇن قالدى.