تۇرىك ايەلدەرى ەندى كۇيەۋىنىڭ تەگىنە وتۋگە مىندەتتى ەمەس

شەشىم وسى اپتادا رەسمي كۇشىنە ەندى. تۇركيادا تۇرمىس قۇرعان كەز كەلگەن ايەل بۇگىنگە دەيىن كۇيەۋىنىڭ تەگىنە اۆتوماتتى تۇردە وتەتىن. بۇل تالاپ ەل كونستيتۋتسياسىندا ناقتى كورسەتىلگەن.

بىرنەشە جىل بۇرىن زاڭعا وزگەرىس ەنىپ، تۇرىك ايەلدەرى ەرىمەن بىرگە ءوز تەگىن دە قوسا جازدىرىپ الىپ جۇرەتىن بولدى. ەندى بۇل زاڭعا دا وزگەرىس ەنىپ وتىر. وعان سايكەس بۇدان بىلاي تۇركيالىق كەلىنشەكتەر ءوز تەگىندە قالۋىنا قۇقىلى.

رەيحان چەلەبي، تۇرعىن:

- وتە ورىندى شەشىم. ماسەلەن، اجىراسقان ايەلدى ويلاڭىز. ول بۇكىل قۇجاتتارىن اۋىستىرۋعا مىندەتتى ەدى. قوعامدا دا اجىراسقانى وسىلاي ءبىلىنىپ جاتاتىن. ارينە، ەشكىم اجىراسامىن دەپ ۇيلەنبەيدى. 21-عاسىردامىز. بۇل تەڭدىككە ساي شەشىم بولدى.

سيەۆينچ يىلماز، تۇرعىن:

- قولدايمىن. وتاۋ قۇرۋ - ول تەك ەر ازاماتتىڭ ەمەس، ايەلدىڭ دە مىندەتى. ال ماجبۇرلەۋ - ءبىرجاقتى قۇقىقتى شەكتەۋ. ۇيلەنۋ تەكتى اۋىستىرۋ ەمەس. ول - ورتاق شەشىم. ورتاق سەزىم. ايەلدەرگە ەندى تۇرمىس قۇرعاننان سوڭ ءوز تەگىن قوسا الىپ ءجۇرۋ ءۇشىن ءوتىنىش جازۋ تالاپ ەتىلمەيدى. ءوزىنىڭ تەگىن ساقتاپ قالام دەسە ءوز ەركى.

كەنجەتاي ءالىپ، زاڭگەر:

- بۇگىن، مىنە، 1934 -جىلى قابىلدانعان زاڭعا تۇبەگەيلى وزگەرىس ەندى. ايەل مەن ەر كىسىنىڭ تەڭدىگى تۇرعىسىنان كەش تە بولسا، دۇرىس قابىلدانعان شەشىم بولدى. بۇعان دەيىن تاڭداۋ بولمايتىن. قالاساڭ دا، قالاماساڭ دا، كۇيەۋىڭنىڭ تەگىن الاتىنسىڭ. ايەلگە قوس فاميليانى قولدانۋ ىڭعايسىز. ماسەلەن، تۇركيادا قوس ەسىمدى ادامدار كوپ. وعان قوس تەكتى قوسىڭىز. ايشەگۇل- اينۇر ديلەكشي- يۋرتسيەۆەن دەۋ دە ىڭعايسىز. ەر كىسىلەردە مۇنداي پروبلەما جوق.

بۇرىنعى زاڭ تالاپتارىن تەڭدىككە قايشى دەپ تاپقان كونستيتۋتسيالىق سوت ونىڭ كۇشىن جويدى. ەندى ايەل قاي تەكتى قابىلدايمىن دەسە دە ەرىك وزىندە. ال بۇل وزگەرىستى پاتريارحالدى تۇرىك قوعامى قالاي قابىلدايدى، ول ۋاقىت ەنشىسىندە.

اۆتورى: مەرۋەرت قاناعات.

 www.24.kz