اتالعان قۇجاتتى دەپۋتاتتار ۆەتەريناريا سالاسىنداعى قولدانىستاعى زاڭنامانى ودان ءارى جەتىلدىرۋ، ۆەتەريناريالىق مامانداردىڭ الەۋمەتتىك قورعالۋىن ارتتىرۋ، ۆەتەريناريالىق سالاۋاتتىلىق پەن تاماق ونىمدەرىنىڭ قاۋىپسىزدىگىن قامتاماسىز ەتۋ ماقساتىندا ازىرلەدى. زاڭ جوباسىندا كەلەسى نەگىزگى باعىتتار بويىنشا ءبىرقاتار وزگەرىس پەن تولىقتىرۋ ەسكەرىلگەن.
اتاپ ايتقاندا، زاڭ جوباسىنىڭ ەرەجەلەرىن ىسكە اسىرۋعا مەملەكەتتىك بيۋدجەتتەن جىل سايىن شامامەن 27 ميلليارد تەڭگە ءبولۋ جوسپارلانعان.
بىرىنشىدەن، مەملەكەتتىك باسقارۋ دەڭگەيلەرى اراسىنداعى وكىلەتتىكتەردى اجىراتۋ جانە ۆەتەريناريالىق ۇيىمداردىڭ فۋنكسيالارىن ناقتىلاۋ قاراستىرىلعان:
— رەسپۋبليكالىق ەپيزووتياعا قارسى جاساق ۆەتەريناريالىق پرەپاراتتاردىڭ اينالىمىنا بايلانىستى قىزمەتتەردىڭ تولىق كەشەنىن، سونداي-اق الىپ قويىلاتىن جانە جويىلاتىن اۋرۋ مالداردىڭ، مالدان الىناتىن ونىمدەر مەن شيكىزاتتىڭ قۇنىن يەلەرىنە وتەۋ فۋنكسيالارىن جۇزەگە اسىرادى؛
— ۆەتەريناريالىق باقىلاۋ جانە قاداعالاۋ كوميتەتىنىڭ قاراۋىندا ەپيزووتيالىق وشاقتاردى تەكسەرۋ، ۆەتەريناريا سالاسىندا ليسەنزيالار مەن رۇقساتتاردى بەرۋ قامتىلادى؛
— ۆەتەريناريا جونىندەگى ۇلتتىق رەفەرەنتتىك ورتالىق ۆەتەريناريالىق پرەپاراتتاردى ءوندىرۋ سالاسىنداعى ساراپتامالىق قىزمەتتى جۇزەگە اسىرادى.
ۆەتەريناريالىق دارىگەرلەردىڭ مارتەبەسىن كوتەرۋ
— ۆەتەريناريا ماماندىعىنىڭ، اسىرەسە اۋىلدىق جەرلەردە، تارتىمدىلىعىنىڭ جەتكىلىكسىزدىگى كادر تاپشىلىعىنا، جۇمىس ىستەپ جۇرگەن ماماندارعا تۇسەتىن جۇكتەمەنىڭ ارتۋىنا جانە ۆەتەريناريالىق ءىس- شارالاردىڭ ۋاقتىلى جۇرگىزىلۋىنە كەرى اسەرىن تيگىزىپ جاتىر. وسى ماسەلەلەردى شەشۋ ماقساتىندا زاڭ جوباسىندا ۆەتەريناريا ماماندارىن الەۋمەتتىك جانە كاسىبي قولداۋ شارالارىن ەداۋىر جاقسارتۋ كوزدەلدى. ءقازىر ۆەتەريناريا ماماندارىنىڭ ورتاشا جالاقىسى شامامەن 220 مىڭ تەڭگە. زاڭ قابىلدانعان جاعدايدا، جالاقىنى كەم دەگەندە 420 مىڭ تەڭگەگە دەيىن ارتتىرۋ ەسكەرىلگەن، — دەدى قۇرىلتايدىڭ اگرارلىق ماسەلەلەر، ەكولوگيا جانە تابيعي رەسۋرستار كوميتەتىنىڭ ءتوراعاسى سەرىك ەگىزبايەۆ.
ونىڭ ايتۋىنشا، زاڭ جوباسىندا ۆەتەريناريا ماماندارىنا كەمىندە ەكى لاۋازىمدىق ايلىق اقى مولشەرىندە ساۋىقتىرۋعا جاردەماقى تولەي وتىرىپ، جىل سايىنعى اقىلى ەڭبەك دەمالىسىنا شىعۋ كەپىلدىكتەرى ۇسىنىلدى. عىلىمي دارەجەسى ءۇشىن قوسىمشا اقىلار: عىلىم كانديداتىنا — ايلىق ەسەپتىك كورسەتكىشتىڭ 17 ەسەلەنگەن مولشەرىندە، عىلىم دوكتورىنا — نەگىزگى جۇمىس ورنى بويىنشا ايلىق ەسەپتىك كورسەتكىشتىڭ 34 ەسەلەنگەن مولشەرىندە قوسىمشا اقى تولەۋ قاراستىرىلعان. مۇنىمەن قوسا، مامانداردى ارنايى كيىممەن قامتاماسىز ەتۋ كوزدەلگەن.
سونىمەن قاتار ۆەتەريناريالىق دارىگەرلەردىڭ قۇقىقتارى مەن كاسىبي مۇددەلەرىن قورعاۋ، ولاردى ەسەپكە الۋ، بىلىكتىلىگىن ارتتىرۋ ماقساتىندا ۆەتەريناريا سالاسىنداعى قوعامدىق ۇيىم نىسانىندا ۆەتەريناريالىق پالاتا قۇرۋ ەسكەرىلگەن.
باقىلاۋدى كۇشەيتۋ
دەپۋتات سەرىك ەگىزبايەۆتىڭ سوزىنە قاراعاندا، تاماق ونىمدەرىنىڭ قاۋىپسىزدىگىن قامتاماسىز ەتۋ ماقساتىندا زاڭ جوباسىندا مالدان الىناتىن ونىمدەر مەن شيكىزاتتى وتكىزەتىن ساۋدا وبەكتىلەرىندە مەملەكەتتىك ۆەتەريناريالىق- سانيتاريالىق باقىلاۋ مەن قاداعالاۋدى تۇراقتى نەگىزدە جۇرگىزۋ ۇسىنىلدى.
— ۆەتەريناريالىق سالاۋاتتىلىقتى قامتاماسىز ەتۋ جانە مال باسىن ەسەپكە الۋدىڭ دۇرىستىعىن ارتتىرۋ جونىندە ۋاقتىلى شارالار قابىلداۋ ماقساتىندا جەكە جانە زاڭدى تۇلعالاردىڭ مالدى وتكىزۋ جانە سويۋ تۋرالى، سونداي- اق ولاردى سايكەستەندىرۋ بۇيىمدارىنىڭ جوعالعانى نەمەسە بۇلىنگەنى تۋرالى حابارلاۋ مەرزىمدەرىن ساقتاۋ جونىندەگى مىندەتتەرى بەلگىلەنەدى، — دەدى دەپۋتات.
بۇدان بولەك، ۆەتەريناريالىق پرەپاراتتاردىڭ اينالىمى ءراسىمىن ەۋرازيالىق ەكونوميكالىق وداقتىڭ قۇجاتتارىنا سايكەس كەلتىرۋ قاراستىرىلعان. زاڭ جوباسىندا ۆەتەريناريالىق پرەپاراتتاردىڭ اينالىمىن باقىلاۋ جونىندەگى فارماتسيەۆتيكالىق ينسپەكسيا قۇرۋ كوزدەلەدى. بۇل نورما ۆەتەريناريالىق پرەپاراتتاردىڭ ساپاسى مەن قاۋىپسىزدىگىن ارتتىرۋعا، ولاردى وندىرۋگە قويىلاتىن ءبىرىڭعاي تالاپتاردى قامتاماسىز ەتۋگە، سونداي- اق وندىرۋشىلەردىڭ جاۋاپكەرشىلىگىن كۇشەيتۋگە مۇمكىندىك بەرەدى.
دەپۋتات بوتا ەلەۋسىزوۆانىڭ ايتۋىنشا، زاڭ جوباسىنىڭ نەگىزگى ەرەجەلەرىنە قوسىمشا رەتىندە، ونىمەن جۇمىس ىستەۋ بارىسىندا دەپۋتاتتار مەملەكەتتىك ۆەتەريناريالىق- سانيتاريالىق باقىلاۋ مەن قاداعالاۋدى كۇشەيتۋگە، مال اۋرۋلارىنىڭ الدىن الۋ تيىمدىلىگىن ارتتىرۋعا جانە ءونىم قاۋىپسىزدىگى مەن ادام دەنساۋلىعىن قورعاۋعا باعىتتالعان ماڭىزدى تۇزەتۋلەر ەنگىزدى. اتاپ ايتقاندا، مال سويۋ نىساندارىنا، ءونىم مەن شيكىزات ساقتاۋ ورىندارىنا، ۆەتەريناريا سالاسىنداعى كاسىپكەرلىك سۋبەكتىلەرىنە جانە بيۋدجەتتەن قارجىلاندىرىلاتىن ءىس-شارالارعا قاتىستى باقىلاۋدى كاسىپكەرلىك كودەكسىنىڭ نورمالارىن قولدانباي، تىكەلەي سالالىق زاڭناما اياسىندا جۇزەگە اسىرۋ ۇسىنىلدى.
— تاسىمالداناتىن نىسانداردىڭ قاۋىپسىزدىگى مەن قاداعالانۋىن قامتاماسىز ەتۋ شارالارى كۇشەيتىلەدى. سونىمەن قاتار، ۆەتەريناريالىق قۇجاتتارسىز تاسىمالداناتىن ونىمدەردى تەكسەرۋ، دياگنوز قويۋ نەمەسە ساراپتاما جۇرگىزۋ كەزەڭىندە ۋاقىتشا الىپ قويۋ مۇمكىندىگى قاراستىرىلۋدا. ءونىم اينالىمىنىڭ بارلىق كەزەڭىندە قاۋىپسىزدىكتى قامتاماسىز ەتۋ ماقساتىندا قوعامدىق تاماقتاندىرۋعا ارنالعان اۋىل شارۋاشىلىعى جانۋارلارىن ارنايى بەلگىلەنگەن نىسانداردان تىس جەردە سويۋعا تىيىم سالىنادى، — دەدى بوتا ەلەۋسىزوۆا.
مالدىڭ اسا قاۋىپتى اۋرۋلارىنا كۇدىك تۋىنداعان جاعدايدا، ناقتى دياگنوز قويىلعانعا نەمەسە كارانتين ەنگىزىلگەنگە دەيىن ۋاقىتشا ۆەتەريناريالىق شارالاردى (جانۋارلاردى وقشاۋلاۋ، سويۋدى، ساقتاۋدى، تاسىمالداۋدى توقتاتا تۇرۋ) قولدانۋ كوزدەلگەن. سونداي-اق، ۆەتەريناريا سالاسىنداعى سۋبەكتىلەردىڭ جاۋاپكەرشىلىگى ارتادى: ۇيىمداستىرىلعان شارۋاشىلىقتاردىڭ شتاتىندا مىندەتتى تۇردە ۆەتەريناريالىق دارىگەردىڭ بولۋى نەمەسە ونى تارتۋ تالاپ ەتىلەدى. ۆەتەريناريالىق-سانيتاريالىق ساراپتامانى جۇزەگە اسىرۋعا ارنالعان ليتسەنزيانىڭ كىشى تۇرلەرى قىزمەت تۇرىنە (ەت، ءسۇت، بالىق، جۇمىرتقا جانە ت. ب.) قاراي ناقتىلانادى.
ۆەتەريناريا سالاسىن سيفرلاندىرۋ
ورنى اۋىستىرىلاتىن وبەكتىلەردىڭ قاداعالانۋىن قامتاماسىز ەتۋ، ەسەپكە الۋ مەن ەسەپتىلىكتى جەتىلدىرۋ، سونداي-اق ۆەتەريناريالىق قىزمەتتى اۆتوماتتاندىرۋ ماقساتىندا ۆەتەريناريا سالاسىندا سيفرلىق جۇيەنى قۇرۋدىڭ جانە ونىڭ جۇمىس ىستەۋىنىڭ نەگىزگى باعىتتارى بەكىتىلەدى. جۇيەدە ۆەتەريناريا سالاسىنداعى سۋبەكتىلەر مەن وبەكتىلەر، جۇرگىزىلەتىن ۆەتەريناريالىق ءىس-شارالار، مەملەكەتتىك ۆەتەريناريالىق- سانيتاريالىق باقىلاۋ مەن قاداعالاۋدى جۇزەگە اسىرۋ، ۆەتەريناريالىق قىزمەت ءىسىنىڭ وزگە دە باعىتتارى تۋرالى مالىمەتتەر قامتىلادى.