پەتروپاۆلداعى جەراستى وتكەلى بار كوپەستىڭ ءۇيى مەيرامحاناعا اينالدى
پەتروپاۆل قالاسىنىڭ ورتالىعىندا، جامبىل مەن سۋتيۋشيەۆ كوشەلەرىنىڭ قيىلىسىندا ⅩⅨ عاسىردىڭ اياعىندا جەرگىلىكتى كوپەس يزمايلوۆ سالعان دۇكەن مەن ۇيدەن تۇراتىن ساۋلەت كەشەنى ورنالاسقان. ونىڭ ەرەكشەلىگى - ەكى عيماراتتى بايلانىستىراتىن جەراستى وتكەلىندە، دەپ حابارلايدى Kazinform.
كوپەس يزمايلوۆ اڭ تەرىسىن ساتىپ الۋشى رەتىندە بەلگىلى بولدى. ول ءبىر قاباتتى عيماراتتى ارنايى دۇكەننىڭ استىنان سالدى. پەتروپاۆلدا كوپەستەر ۇيلەرى كوپ، ولاردىڭ اۋماعىندا ساۋدا نەمەسە وندىرىستىك ءۇي-جايلار ورنالاسقان.
مادەنيەت باسقارماسىنىڭ سايتىنان كەشەن تۋرالى اقپارات تابۋعا بولادى: «دۇكەن مەن كىرپىشتەن سالىنعان ءۇي اراسىندا جەراستى وتكەلى بار. جىلجىمايتىن مۇلىك قۇرامىنا قويما (1996 -جىلى قالپىنا كەلتىرىلگەن جانە مەيرامحانا رەتىندە پايدالانىلاتىن قويما ءۇي-جايلارى) كىرەدى. 1917 -جىلدان كەيىن عيمارات ۇلتتاندىرىلىپ، ءارتۇرلى كەڭەستىك مەكەمەلەرگە بەرىلدى. عيمارات ءبىر قاباتتى، كىرپىشتەن سالىنعان جانە سىلانباعان. تەرەزەلەرگە تەمىر تورلار سوعىلعان».
كاسىپكەردىڭ يەلىگىنەن قويمالار، ساۋداگەردىڭ دۇكەنى جانە ءۇيدىڭ ءوزى ساقتالعان. الايدا، وسىدان ءبىر عاسىر بۇرىن ءدال وسى اۋماقتا ەكى قاباتتى ءۇي بولعان، ونىڭ بۇگىنگى كۇنگە دەيىن تەك ىرگەتاسى عانا ساقتالعان. ءبىرىنشى قاباتى كىرپىش، ەكىنشىسى بورەنە بولعانى بەلگىلى.
كوپەس ءۇيى Г ءپىشىندى جانە ەرلەر مەن ايەلدەرگە ارنالعان ەكى كىرەبەرىسى بولعان.
دۇكەن مەن قويما 1850-1875 -جىلدار ارالىعىندا سالىنعان. قازىر وندا «گەنەرال كورنيلوۆ» مەيرامحاناسىنىڭ ءبىر بولىگى ورنالاسقان. ەكىنشىسىن يەلەرى عيماراتتى كۇردەلى جوندەۋدەن وتكىزۋ كەزىندە سالعان. سوندىقتان مەيرامحانانىڭ جارتىسىنا - 1,5 عاسىر، ەكىنشى جارتىسىنا - وتىز جىلعا جۋىق ۋاقىت بولدى.
مەيرامحانانىڭ ىشىنەن ءجۇز جىلدىق تاريحى بار كىرپىشتى كورۋگە بولادى. كىرپىش بەرىكتىگىنىڭ سىرى - جۇمىرتقا اقۋىزى قوسىلعان ارنايى ەرىتىندىدە دەگەن پىكىر بار.
ساۋلەت كەشەنىن قالپىنا كەلتىرۋ جۇمىستارى 1996-1997 -جىلدارى جۇرگىزىلدى. قالپىنا كەلتىرۋ كەزىندە اتى اڭىزعا اينالعان جەراستى وتكەلى تابىلدى. ول كەزدە وتكەل قيراپ قالعاندىقتان ونى زەرتتەۋ مۇمكىن بولمادى، ءبىراق ماماندار ونىڭ تومەن بولعانىن جانە ونىڭ بويىمەن تولىق بيىكتىكتە ءجۇرۋ مۇمكىن ەمەس ەكەنىن ايتتى.
كوپەس يزمايلوۆتىڭ ءۇيى جەرگىلىكتى ماڭىزى بار تاريحي جانە مادەني ەسكەرتكىشتەردىڭ مەملەكەتتىك تىزىمىنە ەنگىزىلگەن.
وتكەن جىلدىڭ سوڭىندا ەسكەرتكىشكە قاتىستى جانجال تۋدى. عيمارات يەسى قاسبەتىن زاماناۋي ماتەريالدارمەن قاپتاۋدى ۇيعاردى. بۇل جاعدايعا ءتىپتى وبلىستىڭ بۇرىنعى اكىمى قۇمار اقساقالوۆ تا تۇسىنىك بەردى. سودان كەيىن جۇمىس توقتاتىلعانىمەن، سۋتيۋشيەۆ كوشەسى جاعىنداعى قابىرعانىڭ ءبىر بولىگى ءالى كۇنگە مەتالل قاپتامامەن جابىق تۇر.