پەتروپاۆلدا ۆەيپ ساتىپ جۇرگەن جاستار ۇستالدى
پەتروپاۆل. KAZINFORM - پەتروپاۆلدا ۆەيپ ساتۋدى كاسىپكە اينالدىرعان ءۇش كۇدىكتى ۇستالدى. ولاردان 200 گە جۋىق ەلەكتروندى تەمەكى تاركىلەندى.
سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كۇدىكتىلەردى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەدەل- ىزدەستىرۋ ءىس- شارالارى بارىسىندا ۇستادى. پەتروپاۆلدىڭ 24 جاستاعى تۇرعىنى مەن قىزىلجار اۋدانىنىڭ 26 جاستاعى تۇرعىنى جۇمابايەۆ كوشەسىندەگى ءۇيدىڭ اۋلاسىندا قولعا ءتۇستى. قالا تۇرعىنىنا تيەسىلى Mazda اۆتوكولىگىنەن 26 ۆەيپ تاركىلەندى.
پوليتسەيلەردىڭ ايتۋىنشا، جاستار بۇل ونىمدەردى Telegram ارقىلى ساتقان. وسى قىلمىسقا قاتىسى بار تاعى ءبىر كۇدىكتى - 18 جاستاعى پەتروپاۆل تۇرعىنى Lada اۆتوكولىگىمەن پۋشكين كوشەسىندەگى ۇيلەردىڭ اۋلاسىندا ۇستالدى. پوليتسيا قىزمەتكەرلەرى كولىكتىڭ جۇك سالعىشىنان 154 ەلەكتروندى تەمەكىنى تاركىلەدى.
«شەگىلمەيتىن تەمەكى ونىمدەرىنىڭ، ەلەكتروندىق تۇتىنۋ جۇيەلەرىنىڭ (ۆەيپ)، ولارعا ارنالعان حوش يىستەندىرگىشتەر مەن سۇيىقتىقتاردىڭ اينالىمى فاكتىلەرى بويىنشا قىلمىستىق ىستەر قوزعالدى. ەسكە سالايىق، بيىلدان باستاپ ۆەيپتەردى ساتۋعا تىيىم سالىنعان. قازاقستان رەسپۋبليكاسى قىلمىستىق كودەكسىنىڭ 301-1-بابىنىڭ سانكتسياسىنا سايكەس قىلمىس جاساعاندارعا 200 ا ە ك مولشەرىندەگى ايىپپۇل سالىنادى نەمەسە 50 تاۋلىك مەرزىمگە قاماۋعا الۋعا دەيىن جاۋاپكەرشىلىك قاراستىرىلعان»، - دەيدى س ق و پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسى باستىعىنىڭ ورىنباسارى راحات نۇراحمەتوۆ.
بۇعان دەيىن شىمكەنتتە جاسىرىن ەسىرتكى زەرتحاناسىن ۇيىمداستىردى دەگەن كۇدىكپەن ەكى شەتەلدىكتىڭ ۇستالعانىن جازعان ەدىك.