پەتروپاۆلدا تاسقىننان كەيىن سۇرىلگەن ۇيلەردىڭ ورنىنا نە سالىنادى
پەتروپاۆل. KAZINFORM - پەتروپاۆلداعى ويقالا مەن بىلعارى زاۋىتى شاعىن اۋداندارىندا اۋقىمدى جۇمىس باستالدى.
بۇل ەكى شاعىن اۋدان بىلتىر سۋعا كەتىپ، سالدارىنان مۇنداعى ۇيلەردى بۇزىپ الۋعا تۋرا كەلدى. تۇرعىندارى جاڭادان پايدا بولعان «بىرلىك» شاعىن اۋدانىنا كوشىرىلدى.
سولتۇستىك قازاقستان وبلىسى اكىمدىگىنىڭ مالىمەتىنشە، ەندى بۇل بوساعان جەرلەردە 74 سكۆەر پايدا بولماق. جوبانى جۇزەگە اسىرۋعا ءوڭىردىڭ بارلىق اۋداندارى مەن قالالىق ۇيىمدارى اتسالىسادى.
- بىرلەسكەن كۇش- جىگەرمەن 2 مىڭ اعاش وتىرعىزىلىپ، شاعىن ارحيتەكتۋرالىق فورمالار، ورىندىقتار، جارىقتاندىرۋ، سەرۋەندەۋ ايماعى ورناتىلادى. فۋتزالعا ارنالعان ەكى مودۋلدىق سپورتزال سالىنىپ، بالالار مەن سپورت الاڭدارى، ۆولەيبول جانە فۋتبول الاڭدارى پايدا بولادى، - دەپ جازدى ءوڭىر باسشىسى عاۋەز نۇرمۇحامبەتوۆ الەۋمەتتىك جەلىدەگى پاراقشاسىندا.
الەمدەگى ەڭ ۇزىن جاياۋ جۇرگىنشىلەر كوشەسى سانالاتىن قازاقستان كونستيتۋتسياسى كوشەسى دە قايتا جاڭعىرتىلىپ جاتىر. جوبا ءۇش كەزەڭدە جۇزەگە اسادى. قازىرگى ۋاقىتتا استانا كوشەسىنەن پاركوۆايا كوشەسىنە دەيىنگى بولىكتە ينجەنەرلىك جەلىلەر مەن تاس توسەنىشتەردى اۋىستىرۋ، كوگالداندىرۋ جانە عيماراتتاردىڭ قاسبەتىن ءبىرىڭعاي ساۋلەتتىك ستيلدە ارلەۋ جۇمىستارى باستالدى.
بۇدان بولەك تاعى ءبىر ماڭىزدى جوبا - «ماعجان ورتالىعى» قۇرىلماق. مادەني-اعارتۋشىلىق باعىتتاعى ورتالىقتىڭ جانىنا جاڭا جايلى سكۆەر سالىنىپ، قالا تۇرعىندارىنىڭ سۇيىكتى دەمالىس ورنىنا اينالادى.
بۇعان دەيىن پەتروپاۆلدا فۋتبول اكادەمياسىنىڭ قۇرىلىسى باستالاتىنىن جازعان ەدىك.