پەتروپاۆلدا سۋ تاسقىنىنان زارداپ شەككەندەر قانداي سوماعا باسپانا الا الادى

پەتروپاۆل. KAZINFORM - پەتروپاۆلدا بىرەر كۇندە سۋ تاسقىنىنىڭ ەكىنشى تولقىنى باستالادى. ءبىراق مامانداردىڭ بولجامىنشا، بۇل جولى ونىڭ قارقىنى تومەن، قاتتى جايىلمايدى. سول سەبەپتى قازىر سۋى تارتىلعان اۋماقتارداعى تۇرعىن ۇيلەرگە از ۋاقىت ىشىندە تەحنيكالىق زەرتتەۋ جۇرگىزۋ مىندەتى تۇر.

وبلىستىق اكىمدىكتە وتكەن جيىندا تاسقىننىڭ زاردابىمەن كۇرەسۋ جولدارى ايتىلدى. ءبىرىنشى كەزەكتە ۇيىنەن ايىرىلعانداردى باسپانامەن قامتۋ ماسەلەسى تۇر. پەتروپاۆلدا 2 مىڭعا جۋىق تۇرعىن ءۇي سۋ استىندا قالدى. سونىڭ جارتىسىنان استامى ويقالا اۋدانى تۇرعىندارىنىڭ باسپانالارى. وبلىس تۇرعىندارىنا ءبىرجولعى تولەمگە 700 ميلليون استام تەڭگە بولىنگەن. قازىرگى ۋاقىتتا 957 ادام تيەسىلى كومەكتى الدى. قالعاندارى اپتا سوڭىنا دەيىن الماق.

«قازىر ويقالا اۋدانىندا 12 جەكە تۇرعىن ۇيگە تەحنيكالىق زەرتتەۋ جۇرگىزىلدى. تۇرعىن ءۇي قورىنان 2 جانە 3 بولمەلىك 18 پاتەر دايىندالدى. كوممەرتسيالىق تۇرعىن ۇيلەردەن 197 پاتەرلىك پۋل قۇرىلدى. قۇرىلىس كومپانيالارىمەن مەموراندۋم جاسالدى. پاتەر باعاسى شامامەن 22 ميلليون تەڭگەدەن اسپاۋى ءتيىس. 72 پاتەرلىك توعىز قاباتتى ءۇيدىڭ جوبالىق- سمەتالىق قۇجاتى ءازىر. ونىڭ ءبىر شارشى مەترى 320 مىڭ تەڭگە بولماق. تاعى 5 بەس ءۇي سالۋ جوسپاردا بار. پەتروپاۆلداعى ريەلتورلارمەن دە كەلىستىك. سونداي-اق جەكە تۇرعىن ۇيلەر سالۋ ءۇشىن سولنەچنىي كەنتىنەن 100 جەر ۋچاسكەسى ءبولىندى»، - دەدى پەتروپاۆل قالاسىنىڭ اكىمى سەرىك مۇحامەديەۆ.

سولتۇستىك قازاقستان وبلىسىنىڭ اكىمى الداعى ەكى-ءۇش ايدىڭ ىشىندە ءۇيسىز قالعان ادامداردىڭ باسپانا ماسەلەسىن شەشۋ مىندەتىن قويدى. قازىر زارداپ شەككەندەردىڭ باسىم بولىگى جاتاقحانالارعا ورنالاستىرىلعان.

بۇعان دەيىن تاسقىننىڭ سالدارىن جويۋعا جانە جوندەۋگە كەلمەيتىن ۇيلەردى بۇزۋعا وڭىردە 100-دەن استام مەحانيكالىق بريگادا قۇرىلاتىنىن ايتقان ەدىك.

اۆتور
اقەركە داۋرەنبەك قىزى