پەتروپاۆلدا ەكى كۇندە 15 ميلليون تەڭگەنىڭ ۆەيپتەرى تاركىلەندى

پەتروپاۆل. KAZINFORM - پەتروپاۆلدا زاڭمەن تىيىم سالىنعانىنا قاراماستان ۆەيپتەردى ساتۋدىڭ ءۇش دەرەگى انىقتالدى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى پەتروپاۆلداعى ينتەرناتسيونال كوشەسىندەگى بۋتيكتەردىڭ بىرىنەن تىيىم سالىنعان زاتتاردىڭ ساۋداعا تۇسكەنىن انىقتادى. ءتىنتۋ كەزىندە ەكى ءتۇرلى 150 ۆەيپ تاركىلەندى. تاركىلەنىپ الىنعان زاتتاردىڭ جالپى سوماسى 2 ميلليون 400 مىڭ تەڭگە.

ءدال سول كۇنى جەدەل ۋاكىلدەر التىنسارين كوشەسىندە 19 جاستاعى قالا تۇرعىنى جالعا العان گاراجدان 197 ۆەيپ پەن ولارعا ارنالعان سۇيىقتىق قۇيىلعان 542 قۇتىنى انىقتاپ، تاركىلەدى. تاركىلەنگەن زاڭسىز تاۋاردىڭ جالپى سوماسى 7 ميلليون تەڭگەنى قۇرادى. جاس جىگىت بۇل تاۋاردى ساتۋعا زاڭمەن تىيىم سالىنعانىن بىلە تۇرا، ساۋداسىن جۇرگىزگەن، ول ءۇشىن Telegram مەسسەندجەرىن پايدالانعان.

بۇدان بولەك، دوبروۆولتسيەۆ كوشەسىنىڭ بويىندا باسقارمانىڭ جەدەل ۋاكىلدەرى Volkswagen اۆتوكولىگىنىڭ 19 جاستاعى جولاۋشىسىنان ءتۇرلى ماركاداعى 272 ۆەيپ پەن ولارعا ارنالعان سۇيىقتىق قۇيىلعان 130 قۇتىنى انىقتادى. تاركىلەنگەن تاۋاردىڭ قۇنى 6 ميلليون 220 مىڭ تەڭگەگە باعالانىپ وتىر.

جىگىتتىڭ ايتۋىنشا، ول دا زاڭمەن بۇل تاۋارعا تىيىم سالىنعانىن بىلگەن، سوعان قاراماستان تانىمال مەسسەندجەردەگى كانالدى پايدالانىپ، وسى ونىمدەردى ساتىپ كەلگەن.

بارلىق ءۇش فاكتى بويىنشا سوتقا دەيىنگى ءىس جۇرگىزۋ باستالدى، تەرگەۋ ءجۇرىپ جاتىر.

مامانداردىڭ ايتۋىنشا، سۇيىق قوسپالار تۇرىندەگى نيكوتين دەنساۋلىققا، اسىرەسە، جاسوسپىرىمدەر ءۇشىن وتە قاۋىپتى. ۆەيپتى پايدالانۋ ميدىڭ، جۇرەك- قان تامىر جۇمىسىنا كەرى اسەرىن تيگىزەدى، اللەرگيالىق رەاكتسيالاردى قوزدىرادى.

بۇعان دەيىن س ق و-دا ەكونوميكالىق تەرگەپ-تەكسەرۋ دەپارتامەنتى ماماندارى كريپتوۆاليۋتا ايىرباستاۋ پۋنكتىن زاڭسىز قۇرىپ، تابىس تاۋىپ كەلگەندەردىڭ ءىسىن اشكەرەلەگەنىن جازعان ەدىك.

اۆتور
اقەركە داۋرەنبەك قىزى