پەتروپاۆلدا 9-10 جاسار قىز بالا قاعىپ قۇلاتقان سوعىس ارداگەرى اۋرۋحاناعا ءتۇستى

پەتروپاۆل. KAZINFORM - پەتروپاۆلدا تازا اۋا جۇتۋعا شىققان ەكىنشى دۇنيەجۇزىلىك سوعىس ارداگەرى ۆاسيلي ماكيەنكو ويدا-جوقتا جاراقات الىپ، اۋرۋحاناعا ءتۇستى.

مايدانگەردىڭ تۋىستارىنىڭ ايتۋىنشا، ول كۇندە ساياباققا بارىپ، قۇستارعا جەم شاشۋدى ادەت قىلعان. ال كەشە جولدا ونى 9-10 جاسار قىز بالا قاعىپ كەتكەن. ارداگەر جەدەل جاردەم كولىگىمەن اۋرۋحاناعا جەتكىزىلدى.

- ۆاسيلي ماكيەنكو كوپسالالى قالالىق جەدەل مەديتسينالىق جاردەم اۋرۋحاناسىنىڭ تراۆماتولوگيا بولىمىنە جاتقىزىلدى. مەديتسينالىق تەكسەرۋدەن كەيىن وعان «جامباس سۇيەكتەرىنىڭ سىنۋى» دياگنوزى قويىلدى. جاعدايى ورتاشا اۋىر دەڭگەيدە. سىنعان سۇيەكتەر ورنىنان قوزعالماعان، ياعني حيرۋرگيالىق ەمدەۋدى قاجەت ەتپەيدى. جاعدايىن باقىلاۋدا ۇستاپ، ەمدەۋ ءۇشىن ستاتسيونارعا جاتقىزىلدى، - دەدى سولتۇستىك قازاقستان وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى گۇلنار قاليەۆا.

س ق و پوليتسيا دەپارتامەنتى وقيعاعا قاتىستى ءسال كەيىنىرەك جاۋاپ بەرمەك.

ۆاسيلي ماكيەنكو - س ق و-داعى كوزى ءتىرى ءۇش مايدانگەردىڭ ءبىرى.

بۇعان دەيىن 99 جاسقا كەلگەن مايدانگەرگە قۇرمەت كورسەتىلگەنىن جازعان ەدىك.

اۆتور

اقەركە داۋرەنبەك قىزى