پەتروپاۆل پوليتسەيلەرى ءۇش كۇندە 8 ينتەرنەت-الاياقتىقتىق فاكتىسىن اشكەرەلەدى
پەتروپاۆل. KAZINFORM - سولتۇستىك قازاقستان وبلىسىنىڭ پوليتسەيلەرى اقپاراتتىق تەحنولوگيالار سالاسىنداعى قىلمىسپەن كۇرەسكە باعىتتالعان «Anti-fraud» جەدەل-پروفيلاكتيكالىق ءىس-شاراسىن وتكىزدى.
س ق و پوليتسيا دەپارتامەنتىنىڭ مالىمەتىنشە، كريمينالدىق پوليتسيا بولىنىستەرىنىڭ قىزمەتكەرلەرى ءۇش كۇن بويى ۇيىمدار مەن ادامدار كوپ جينالاتىن ورىنداردا جادىنامالار تاراتىپ، جەلىلىك الاياقتاردىڭ نەگىزگى ايلا-تاسىلدەرى تۋرالى ايتقان. سونداي-اق ءتارتىپ ساقشىلارى الاياقتار ءجيى پايدالاناتىن الەۋمەتتىك جەلىلەرگە مونيتورينگتى كۇشەيتكەن.
پوليتسەيلەردىڭ ايتۋىنشا، كيبەرالاياقتارعا الدانىپ قالعان ادامداردىڭ كەيبىرى پوليتسياعا جۇگىنبەيدى ەكەن. وبلىس تۇرعىندارىمەن جۇزدەسىپ، سويلەسۋ بارىسىندا ءارى الەۋمەتتىك جەلىلەردەگى كوممەنتارييلەردى تەكسەرە كەلە 8 فاكتى انىقتالعان. ولاردىڭ دەرلىگى ينتەرنەتتەگى حابارلاندىرۋلارعا قىزىعىپ، تاۋارلار ساتىپ الۋ كەزىندە الدىن الا تولەم جاساعان نەمەسە بوگدە بىرەۋدىڭ اتىنا شاعىن نەسيە رەسىمدەۋمەن بايلانىستى فاكتىلەر بولىپ شىققان. پوليتسەيلەر اشكەرە بولعان ءار فاكت بويىنشا زارداپ شەككەن جابىرلەنۋشىلەردى ارىز جازۋعا كوندىردى. ناتيجەسىندە بارلىق قىلمىستار قىسقا ۋاقىت ىشىندە اشىلعان.
«باسقا بىرەۋدىڭ اتىنا شاعىن نەسيە رەسىمدەۋ قاۋپى كوبىنەسە جاقىن ادامداردان نەمەسە تۋىستاردان كەلەدى. نە بولماسا دوستارى ارقىلى جۇزەگە اسادى. شاعىن نەسيە ۇيىمدارىنىڭ قىزمەتىن پايدالانبايتىن ەگدە جاستاعى ادامدار بەت-الپەت ارقىلى فوتو-ۆيدەو راستاۋ قاجەت ەكەنىنەن حابارسىز بولعانى ءۇشىن ءجيى زارداپ شەگەدى. قاسكويلەر جاقىندارىنىڭ اڭقاۋلىعىن ءساتتى پايدالانىپ، ءار نارسەنى سىلتاۋ ەتىپ ولاردى فوتوعا ءتۇسىرىپ، نەسيەلەر راسىمدەيدى. ەگەر سىزدەرگە ءوزىڭىز الماعان الدەبىر قارىزدى تولەۋدى تالاپ ەتە باستاسا، بىردەن پوليتسياعا جۇگىنىڭىز. بۇل تۋرالى ۇيدەگى قاريالارعا دا ەسكەرتىڭىزدەر»، - دەيدى س ق و پ د كريمينالدىق پوليتسيا باسقارماسىنىڭ باستىعى پوليتسيا پودپولكوۆنيگى يۆان تەرزيدي.
ماماندار، ينتەرنەتتەگى حابارلاندىرۋ ءۇشىن الدىن الا تولەم تالاپ ەتىپ، سان سوقتىرىپ كەتسە دە بىردەن پوليتسياعا ارىزدانۋ كەرەگىن ەسكەرتەدى. مۇنداي قىلمىستار ءجيى اشىلاتىن قىلمىستارعا جاتادى.