پەتروپاۆل پوليتسەيلەرى اداسقان ەلىكتى قۇتقاردى

پەتروپاۆل. KAZINFORM - بيىلعى قىستا جانۋارلاردىڭ كوشىپ-قوناتىن مەكەنى مەن جولىنىڭ وزگەرۋىنە بايلانىستى وبلىستىڭ اۋىل ايماقتارىنا ەلىكتەر كوپتەپ كەلگىشتەي باستاعان.

سولتۇستىك قازاقستان وبلىسى پوليتسيا دەپارتامەنتى قىزمەتكەرلەرى جۇرگىزۋشىلەرگە تەك قالا سىرتىنداعى تراسسالاردا عانا ەمەس، اۋىل ىشىندە دە ەلىكتەردىڭ كەزدەسۋى مۇمكىن ەكەنىن ەسكە سالادى.

پەتروپاۆلداعى جۇمىسشى كەنتىنىڭ اۋماعىندا اداسىپ جۇرگەن ەلىكتى تۇرعىنداردىڭ كوزى شالعان. ماماندار بۇل ءوز كەزەگىندە جول-كولىك وقيعاسىنا سەبەپشى بولۋى مۇمكىن ەكەنىن ايتىپ، ەسكەرتەدى. جەرگىلىكتى تۇرعىندار بۇل تۋرالى «102» ارناسىنا حابارلاعان. شاقىرۋعا تابيعاتتى قورعاۋ پوليتسياسىنىڭ قىزمەتكەرلەرى مەن قورىقشىلار كەلىپ جەتتى. ولار № 43-مەكتەپ ستاديونىندا ءوز ۇيىرىنەن كوز جازىپ قالعان ەلىكتى ۇستاپ، ورمانعا جەتكىزدى.

«قازىرگى ۋاقىتتا تۇياقتى جابايى جانۋارلاردى اۋلاۋعا تىيىم سالىنعانىن ەسكەرتەمىز. 3 مىڭ ايلىق ەسەپتىك كورسەتكىش ايىپپۇلدان 10 جىلعا دەيىن باس بوستاندىعىنان ايىرۋ كوزدەلگەن قىلمىستىق جاۋاپكەرشىلىك تونەتىنىن ۇمىتپاۋلارىڭىزدى سۇرايمىز»، - دەيدى س ق و پ د ج پ ق باسقارماسى تابيعاتتى قورعاۋ پوليتسياسى توبىنىڭ ەرەكشە تاپسىرمالار جونىندەگى اعا ينسپەكتورى پوليتسيا پودپولكوۆنيگى اسحات قوجابايەۆ.

اقپان ايىندا تابيعاتتى قورعاۋ پوليتسياسىنىڭ قىزمەتكەرلەرى «براكونەر» جەدەل-پروفيلاكتيكالىق ءىس-شاراسى اياسىندا جۇمىس ىستەپ جاتقاندارىن ەسكە سالاي كەتەيىك. س ق و پوليتسەيلەرى مۇددەلى ورگاندارمەن بىرلەسىپ اڭشىلىق شارۋاشىلىقتارى مەن قورعالاتىن تابيعي اۋماقتار بويىنشا رەيدتەرگە كىرىستى. ماقساتى - تابيعي رەسۋرستاردى براكونەرلىك پايدالانۋ، اڭ جانە بالىق اۋلاۋ ەرەجەلەرىن بۇزۋ فاكتىلەرىن انىقتاۋ جانە جولىن كەسۋ.