پەتروپاۆل مەكتەپتەرىندە 49 ەر كىسى جالعىزىلىكتى اكە رەتىندە ەسەپكە الىنعان
پەتروپاۆل. KAZINFORM - ەلىمىزدە جالعىزىلىكتى اكەلەردىڭ ستاتيستيكاسى بولەك جۇرگىزىلمەيدى، بالالارىن جالعىز ءوزى تاربيەلەپ جاتقان اكە، انا بولسىن ءبۇتىن ەمەس وتباسى بولىپ سانالادى. پەتروپاۆلداعى ءبىلىم وردالارىندا 4717 تولىق ەمەس وتباسى ەسەپكە الىنعان. سولتۇستىك قازاقستان وبلىستىق ءبىلىم باسقارماسىنىڭ مالىمەتىنشە، سونىڭ 49 ىندا بالالارىن اكەلەرى جالعىز ءوزى ءوسىرىپ-تاربيەلەپ جاتىر. سولاردىڭ ءبىرى - تالعات تۋتۋيەۆ. ەر ادام التى بالانىڭ اكەسى، ۇل-قىزىنىڭ بەسەۋى - كامەلەت جاسىنا تولماعان، مەكتەپتە وقىپ جاتىر. ءتىلشىمىز كوپبالالى، جالعىزىلىكتى اكەنى اڭگىمەگە تارتقان ەدى.
- جالعىزىلىكتى انا تۋرالى ءبىز ءجيى ەستيمىز، ال بالالارىن جالعىز ءوزى تاربيەلەپ جاتقان اكەلەر سيرەك كەزدەسەدى. التى بالامەن جالعىز قالۋىڭىزعا نە سەبەپ؟
- ءبىز دە باقىتتى عۇمىر كەشكەن وتباسى ەدىك. ءبىراق، قايعى شاڭىراعىمىزدى اينالىپ وتپەدى. زايىبىم ەكى جىل بۇرىن كەنەتتەن قايتىس بولدى. ءتىرى ادام تىرلىگىن جاسايدى، سودان بەرى بالالارىما ءوزىم باس-كوز بولىپ، ءوسىرىپ جاتىرمىن.
- ءوزىڭىز جايىندا ايتىپ بەرىڭىزشى...
- مەن ەسىل اۋدانى نيكولايەۆكا ەلدى مەكەنىندە تۋىپ، ءوستىم. قازىر پەتروپاۆلدا تۇرىپ جاتىرمىن. «اتامەكەن س ك» ج ش س-دە تاس قالاۋشى بولىپ ەڭبەك ەتەمىن.
- التى بالانى ءوسىرۋ وڭاي ەمەس، كۇندەلىكتى كۇيبەڭ تىرلىك بار، جۇمىس تا ىستەيسىز، قيىن ەمەس پە؟
- تاماقتى بۇرىننان پىسىرەمىن. ءۇيدىڭ شارۋاسىنان دا حابارسىز ەمەسپىن. ويتكەنى كەلىنشەگىم كوزى تىرىسىندە ءبىر تاۋلىك جۇمىستا كەزەكشىلىك اتقارىپ، ەكى كۇن ۇيدە بولاتىن. ول مەديتسينالىق مەكەمەدە جۇمىس ىستەدى. تۇرمىستا قاتتى قيىندىق تۋا قويعان جوق، پسيحولوگيالىق جاعىنان اۋىر بولدى. جۇمىسىمداعى باسشىلارىما، ارىپتەستەرىمە العىس ايتامىن. مەنىڭ جاعدايىمدى ءتۇسىنىپ، جەڭىلدىكتەر جاسادى. ماسەلەن، جۇمىسقا بالالاردى مەكتەپكە اپارعاننان كەيىن ازداپ كەشىگىپ كەلۋگە رۇقسات بەردى. سونداي-اق تۇسكى ۇزىلىسكە دە ەرتەرەك كەتەتىنمىن. قازىر دە ءبىر جاعدايلار بولىپ، كەتۋ كەرەك بولىپ جاتسا جىبەرەدى.
- بالالارىڭىزدىڭ جاسى نەشەدە، وقۋدان باسقا نەمەن اينالىسادى، قىزىعۋشىلىقتارى بار ما؟
- ءۇش ۇل، ءۇش قىزىم بار. تۇڭعىشىم ۇيلەنگەن، بولەك تۇرادى. ۇلكەن قىزىم الينا 17 جاستا، م. جۇمابايەۆ اتىنداعى مەكتەپ-ليتسەيدە 11-سىنىپتا 4 پەن 5 كە، ودان كەيىنگى ۇلىم 13 كە تولدى، راقىم № 26-مەكتەپتە 8-سىنىپتا وقيدى. ونىڭ دا وقۋى جاقسى. كاراتە ۇيىرمەسىنە بارادى، فۋتبولعا قىزىعۋشىلىعى جوعارى. گيتارا تارتۋدى ۇيرەندى. ءتورتىنشىم - التىن ەسىمدى قىزىم، ول دا قالعان بالالارىم سياقتى № 26-مەكتەپتە وقيدى. 6-سىنىپقا «وتە جاقسى» ناتيجەمەن كوشتى. سۋرەت سالۋدى ۇيرەنىپ ءجۇر. بەسىنشى قىزىم ديانا 5-سىنىپقا كوشتى، ول دا 4 پەن 5 كە وقيدى. قولى بوس ۋاقىتتا مونشاقتان ءتۇرلى زاتتار توقيدى. كەنجە ۇلىمنىڭ ەسىمى جان، 2-سىنىپتىڭ وقۋشىسى، ساباعى جاقسى، ول دا فۋتبولمەن اۋەستەنەدى.
- قىزداردىڭ تاربيەسىندە انانىڭ ورنى بولەك، تىعىرىقتان قالاي شىعاسىز؟
- انانىڭ ورنىن ەشكىم باسپاس، ءبىراق قىزدار مەنەن سۇراي الماعاندارىن جەڭگەلەرىمەن اقىلداسادى، سىرلاسادى. ۇلكەن ۇلىم مەن كەلىنىم بولەك تۇرسا دا، كەلىنىم تاماق ىستەۋگە كومەكتەسەدى. قىزداردى بىلگەنىنە ۇيرەتىپ جاتىر. كىردى وزدەرى جۋادى. ال ءۇيدى كۇندەلىكتى جيناۋ، قوقىس شىعارۋ، تاعى باسقا شارۋالاردى بارلىعى بىرگە اتقارادى.
- قازىرگى ۋاقىتتا جالعىزىلىكتى اكەلەرگە قانداي دا ءبىر كومەك قاراستىرىلعان با؟
- جوق، بالالارعا اسىراۋشىسىنان ايىرىلعانى بويىنشا عانا جاردەماقى تولەنەدى. وسى بويىنشا زاڭدا ولقىلىقتار كوپ. ماسەلەن جالعىزىلىكتى انالار مەملەكەتتىك تۇرعىن ءۇي قورىنان باسپانا الۋ ءۇشىن كەزەككە تۇرا الادى. كوپبالالى انالار زەينەت دەمالىسىنا ەرتە شىعادى. ال اكەلەرگە، اسىرەسە جالعىزىلىكتى اكەلەرگە ەشقانداي جەڭىلدىك جوق. سونداي-اق كوپبالالى نەمەسە قيىن جاعدايعا تاپ بولعان وتباسىلاردى كوممۋنالدىق تولەمنەن بوساتسا، ول اقشانى بالالاردىڭ كەرەك-جاراعىنا جۇمسار ەدىك. مۇنداي وتباسىلار كوپ ەمەس قوي.
ال مەكتەبىمىز قولىنان كەلگەن كومەكتى كورسەتىپ جاتىر. بيىل № 26-مەكتەپ ۇلىم راقىمدى ەكى اپتاعا الماتىعا ماتەماتيكانى تەرەڭدەتىپ وقىتاتىن مەكتەپكە وقۋعا جىبەردى. قىزىم ديانا الماتىداعى «بوبەك» لاگەرىندە ءۇش اپتا دەمالىپ كەلدى. بۇدان بولەك بالالارىم وقيتىن مەكتەپتەر جىل بويى كومەكتەسەدى، «مەكتەپكە جول» اكتسياسى اياسىندا وقۋعا قاجەتتى قۇرال-جابدىقپەن قامتاماسىز ەتەدى. ءتۇرلى ءىس-شارالارعا، مەرەكەلەرگە، جاڭاجىلدىق ەرتەڭگىلىكتەرگە شاقىرىپ، قالدىرمايدى.
- وڭىردە قاجەت بولعان جاعدايدا سىزدەرگە تەگىن پسيحولوگيالىق، زاڭدىق تۇرعىدا، قيىن ساتتەردە ماتەريالدىق كومەك كورسەتەتىن ورتالىقتار بار ما؟
- مۇمكىن بار شىعار. ءبىراق مەن بىلمەيدى ەكەنمىن، سۇراعان دا ەمەسپىن. ويتكەنى ازىرگە قاجەتتىلىك بولمادى. قانداي دا ءبىر تولەم جاسالاتىن بولسا، قۇجاتتار كەرەك بولسا مەكتەبىمىز حابارلايدى. ال جالپى مەن ءۇشىن بۇگىندە ەڭ قيىنى - ۋاقىتتىڭ ازدىعى، اپتاسىنا التى كۇن جۇمىس ىستەيمىن، سالدارىنان بالالارىممەن جەتكىلىكتى تۇردە ۋاقىت وتكىزە المايمىن.
اۆتور
اقەركە داۋرەنبەك قىزى