تۇرمە ءھام ۇلدە مەن بۇلدە: قامالعان جۇلدىزدار قانشا قاراجاتتان قاعىلدى

استانا. KAZINFORM - ونەر جۇلدىزدارىنىڭ ءار كۇنى تابىس اكەلەتىن توي-دومالاق، كونتسەرت، جارنامالىق تۇسىرىلىمگە تولى ەكەنى بەلگىلى. بۇل رەتتە قاماۋعا الىنعان ونەر يەلەرى تەمىر توردىڭ ار جاعىندا جاتقاندا قانشا قاراجاتتان قاعىلدى ەكەن؟

ارينە، ونەر جۇلدىزدارىنىڭ بارلىعى دەرلىك تابىسىن ايتۋعا قۇلىقتى ەمەس. ونى قويشى، قاراپايىم تۇرعىنداردىڭ ءوزى «ءجۇرىپ- تۇرۋىما جەتەدى» دەپ ايلىعىن جاسىرىپ جۇرەدى ەمەس پە؟

انشىلەر تەمىر تورعا 15 كۇن بىلاي تۇرسىن، بەس كۇنگە دە توعىتىلسا دا قالتاسىنا سالماق سالار دەگەن ويمەن ونەر جۇلدىزدارىنىڭ كومەكشىلەرىنە، پروديۋسەرلەرىنە حابارلاستىق. بارلىعى «ونداي اقپارات بەرە المايمىز» دەپ ات- تونىن الا قاشتى.

ەلىمىزگە تانىمال پروديۋسەر التىنبەك راحمەتوۆ بولسا بۇل جايىندا ءوز ويىن ايتىپ بەردى.

«قاماۋعا الىنعان انشىلەر مول تابىستان قاعىلادى دەي الماسپىن. تۇرسىنبەك قاماۋدان شىعا سالا ۇلكەن كونسەرت بەردى. زال لىق تولى. قاماۋعا الىنعانىنىڭ ءوزىن ازىلگە اينالدىرىپ، ودان سايىن كورەرمەننىڭ ىستىق ىقىلاسىنا بولەنىپ جاتىر. قايرات نۇرتاس پەن ءابدىعاپپار ءالقوجا دا قاماۋدان شىعا سالىپ كونتسەرت بەرسىنشى، زالدا ينە شانشار ورىن بولمايتىنىنا سەنىمدىمىن. ۇساق جاعىمسىز ارەكەت جاسادى ەكەن دەپ حالىق جەك كورىپ كەتپەيدى»، - دەيدى پروديۋسەر.

قۇرىلىستا جۇمىس ىستەيتىن قاراپايىم سىلاقشىنىڭ ءوزى ون كۇن جۇمىسقا شىقپاسا قالتاسىنا سالماق سالاتىنى تۇسىنىكتى.

التىنبەك راحمەتوۆتىڭ ايتۋىنشا، قايرات نۇرتاس 19-شىلدە كۇنى اقسۋ قالاسىنىڭ جانە مەتاللۋرگتەر كۇنىنە ارنالعان كونتسەرتتە ونەر كورسەتۋى كەرەك- ءتىن.

«كونسەرت ۇيىمداستىرۋشىسى بولعاندىقتان قايرات بۇل ءىس- شارادا شامامەن 5 ميلليون تەڭگە قاراجاتتان قاعىلعانىن ايتا الامىن. ال، باسقا كونسەرتتەرىن بىلمەدىم. جالپى، كەيبىر ءانشى اپتاسىنا ءبىر رەت تويىنا شىعادى، ەندى ءبىرى قاتارىنان ءار قالاداعى مەرەكەلىك ءىس-شارالارعا شاپقىلاپ كەتەتىنى بەلگىلى»، - دەيدى التىنبەك راحمەتوۆ.

انشىلەر ءار قادامىن الەۋمەتتىك جەلىلەردەگى پاراقشاسىنا جاريالايتىنى بەلگىلى.

بۇل رەتتە گونارارىن بىلسەڭىز شامالاپ بولسىن اپتاسىنا قانشا تابىس تاپقانىن بولجاۋعا بولار.

توي ۇيىمداستىرۋشىلارىنىڭ ايتۋىنشا، قايرات نۇرتاس بۇگىندە كەم دەگەندە 2,5 ميلليون تەڭگەگە تويعا شىعادى. ال تۇرسىنبەك قاباتوۆتى تويىڭىزعا اسابا رەتىندە جالداساڭىز 10-15 مىڭ دوللار قاراجاتىڭىز دايىن بولسىن.

ءابدىجاپپار ءالقوجا بۇعان دەيىنگى بەرگەن سۇحباتتارىنىڭ بىرىندە گونارار سوماسىن ايتۋدان باس تارتقان ەدى.

«بىرەۋلەرگە مەنىڭ گونورارىم سومكەسىنەن الىپ «ءما» دەي سالاتىن اقشا. ال بىرەۋلەرگە ءبىر جىل بويى اينالىپ تاباتىن اقشاسى. گونارار مولشەرىن ايتپايمىن. سەبەبى، گونورارىمدى ايتاتىن بولسام، حالىقتىڭ اراسىندا بىرەۋدىڭ جاعدايى جەتەدى، بىرەۋدىكى جەتپەيدى. گونورارىمدى ايتسام، جاعدايى جەتپەيتىن كىسىلەر، «وي، مىناۋ سۇمدىق ەكەن عوي» دەپ ايتۋى مۇمكىن. ال جاعدايعا قاراپ ايتسام، جاعدايى مىقتى كىسىلەر «مىنانىڭ باعاسى وسىنداي- اق پا؟» دەيدى. سوندىقتان دا ايتپاي- اق قويايىن»، - دەگەن ەدى ءابدىجاپپار.

ەستەرىڭىزگە سالساق، بۇعان دەيىن ۇشاقتا جانجال شىعارعان قازاقستاندىق ءانشى قايرات نۇرتاستىڭ — 15، تاعى ءبىر ورىنداۋشى ءابدىجاپپار ءالقوجا ءتارتىپ ساقشىسىنىڭ زاڭدى تالاپتارىنا باعىنباعانى ءۇشىن 10 تاۋلىككە قامالعانىن جازعان ەدىك.

ونىڭ الدىندا تۇرسىنبەك قاباتوۆ تا ۇشاقتاعى قىلىعى ءۇشىن 5 تاۋلىك وتىرىپ شىقتى.