تۇركىستاننىڭ جەكە ديزاين-كودى ەنگىزىلەدى

استانا. KAZINFORM - تۇركىستان قالاسىنىڭ اكىمدىگى مەن ءماسليحاتىنا قوسىمشا 34 قۇزىرەت بەرىلەدى.

بۇل تۋرالى بۇگىن ماجىلىستە «تۇركىستان قالاسىنىڭ ەرەكشە مارتەبەسى تۋرالى» زاڭ جوباسىنىڭ تانىستىرىلىمى بارىسىندا ۇلتتىق ەكونوميكا ۆيتسە- ءمينيسترى باۋىرجان وماربەكوۆ ايتتى.

«زاڭ جوباسى اياسىندا تۇركىستان قالاسىنىڭ اكىمدىگى مەن ءماسليحاتىنا قوسىمشا 34 قۇزىرەت بەرۋ كوزدەلگەن. بۇل تۇرعىدا قالا ءماسليحاتىنا 7 قۇزىرەت بەرىلەدى. وسى ورايدا قالا قۇرىلىسى رەگلامەنتىن مەن قالانىڭ ديزاين-كودىن، ساۋلەت كەلبەتىن قالىپتاستىرۋ جانە قالا قۇرىلىسىن جوسپارلاۋ قاعيدالارىن، ۇلتتىق قولونەر سالاسىنداعى شەبەرلەر شىعىندارىنىڭ بەلگىلى ءبىر بولىگىن بيۋدجەتتەن وتەۋ قاعيدالارىن، بەينەباقىلاۋ مونيتورينگىن جۇرگىزۋ قاعيدالارىن، كوپشىلىكتى تاماقتاندىرۋ، ساۋدا جانە قىزمەت كورسەتۋ ستاتسيونارلىق ەمەس وبەكتىلەرىن، جازعى الاڭداردى ورناتۋ قاعيدالارىن، سونداي-اق تۇركىستان قالاسىنىڭ اۋماعىندا نىشاندى پايدالانۋ ءتارتىبىن بەكىتۋ ەسكەرىلگەن»، - دەدى ب. وماربەكوۆ.

ونىڭ ايتۋىنشا، قالا اكىمدىگىنە 27 قۇزىرەت بەرىلەدى، ولار نەگىزگى 3 باعىتقا بولىنگەن. ءبىرىنشى باعىت قالانىڭ مادەني يگىلىگى مەن رۋحاني دامۋىن ساقتاۋ ماسەلەلەرىن رەتتەۋگە، سونداي-اق تاريحي- مادەني مۇرا وبەكتىلەرىنىڭ ساقتالۋىن قامتاماسىز ەتۋگە باعدارلانعان.

وسى مىندەتتەردى ىسكە اسىرۋ ءۇشىن تۇركىستان قالاسىنىڭ اكىمدىگىنە كەلەسى قۇزىرەتتەردى بەرۋ ۇسىنىلدى:

- جەرگىلىكتى ماڭىزى بار تاريحي-مادەني ەسكەرتكىشتەردىڭ پايدالانىلۋىنا جانە ولاردى كۇتىپ-ۇستاۋ تارتىبىنە مەملەكەتتىك باقىلاۋدى جۇرگىزۋ؛

- قالانىڭ تاريحي-مادەني مۇرا وبەكتىلەرىن انىقتاۋدى، ەسەپكە الۋدى، ساقتاۋدى، زەرتتەۋدى، پايدالانۋدى جانە ولاردىڭ جاي- كۇيىنە مونيتورينگ جۇرگىزۋدى قامتاماسىز ەتۋ؛

- جەرگىلىكتى ماڭىزى بار تاريحي- مادەني ەسكەرتكىشتەردىڭ عىلىمي رەستاۆراتسيا جۇمىستارى بويىنشا عىلىمي- جوبالاۋ قۇجاتتاماسىن كەلىسۋ.

«ەكىنشى باعىت كەسەنە اينالاسىنداعى قۇرىلىس ستاندارتتارىن جانە قالا اۋماعىندا ءبىرىڭعاي قۇرىلىس ءستيلىن قولدانۋعا باعىتتالعان. بۇل رەتتە، تۇركىستان قالاسىنىڭ اكىمدىگىنە كەلەسى قۇزىرەتتەردى بەرۋ ۇسىنىلدى: قالانىڭ ديزاين-كودىن جانە قالا قۇرىلىسى رەگلامەنتىن ازىرلەۋ، قالا قۇرىلىسى كەڭەسىن قۇرۋ جانە ونىڭ ەرەجەسىن بەكىتۋ»، - دەدى ۆيتسە- مينيستر.

ءۇشىنشى باعىت تۋريستىك قىزمەتكە جاردەمدەسۋ ماسەلەلەرىن رەتتەۋگە جانە ونى دامىتۋ ءۇشىن قولايلى جاعدايلار جاساۋعا ارنالعان. وسى تۇرعىدا تۇركىستان قالاسىنىڭ اكىمدىگىنە تۋريزم ينفراقۇرىلىمىن دامىتۋ شارالارىن قابىلداۋ قۇزىرەتىن بەرۋ جوسپارلانعان.

بۇدان بۇرىن حابارلانعانداي، قوجا احمەت ياساۋي كەسەنەسىنىڭ اينالاسىندا قۇرىلىس شەكتەلەدى.