تۇركىستاندىق جاستار مۇقتاج وتباسىلارعا جىل سايىن ءۇي سالىپ بەرەدى

بيىل «بەكزات» مولتەك اۋدانىنىڭ 1994-جىلى تۋعان ەر ازاماتتارى باس قوسىپ، 4 بولمەلى باسپانا تۇرعىزدى. ءىشىن قاجەتتى تۇرمىستىق تەحنيكامەن جابدىقتاپ، مۇقتاج وتباسىعا تابىستادى.

- قۇرىلىس جۇمىستارىن تۇگەلدەي ءوزىمىز جۇرگىزدىك. كوپشىلىكپەن جينالعان قاراجاتقا ءۇيدى زامان تالابىنا ساي ەتىپ سالدىق. اقىلداسا كەلە، جاڭا ءۇيدى كوپبالالى وتباسىعا سىيلاۋدى ءجون سانادىق. يگى ىسكە ات سالىسقان بارلىق ازاماتتارعا، دەمەۋشىلەرگە راحمەتىمىزدى ايتامىز. بۇل وسى كۇنگە دەيىن مۇقتاج وتباسىلارعا ارناپ سالىنعان 18- ءۇي، - دەدى يگى ءىستى ۇيىمداستىرۋشىلاردىڭ ءبىرى بەكسۇلتان ءابىشوۆ.

بەكزاتتىق جاستاردىڭ سالعان ءۇيى اسىلبەكوۆتار وتباسىنا تابىستالدى. وتاعاسى قۇربانالى مەن جارى ءمولدىر 9 پەرزەنتىمەن بىرنەشە جىلدان بەرى پاتەر جالداپ كۇنەلتىپ كەلگەن. ءوز كەزەگىندە قايىرىمدى ءىستىڭ شاراپاتىن كورگەن وتباسى جاقسىلىققا جانى قۇمار جاندارعا العىسىن ءبىلدىردى.

ايتا كەتەيىك، بۇدان بۇرىن تۇركىستان قالاسىندا جىلۋ ماۋسىمى اياقتالعانىن جازعان بولاتىنبىز.