تۇركىستاندىق 18 جاسار دونوردىڭ بۇيرەگى التى بالانىڭ اكەسىنە بۇيىردى
تۇركىستان. KAZINFORM - تۇركىستان وبلىسىندا العاش رەت مايىتتىك دونوردىڭ اعزاسىن الىپ، مۇقتاج ادامعا سالۋ وتاسى ءساتتى ءوتتى. ترانسپلانتاتسيا تارازدىق تۇرعىن، 6 بالانىڭ اكەسى دارحان وسپانوۆقا جاسالدى.
تۇركىستان وبلىستىق كلينيكالىق اۋرۋحاناسىندا جاسالعان ترانسپلانتاتسيالىق وتا 2 ساعاتقا سوزىلدى.
دارىگەرلەر دونوردىڭ بۇيرەگى ەلىمىزدەگى ءۇش ادامعا ساي كەلگەنىنەن، ءبىراق ءدال وسى ناۋقاستىڭ سايكەستىگى باسىم بولعانىن ايتادى. مۇنداي وتا تۇركىستان وبلىسىندا العاش رەت جاسالىپ وتىر.
«قازىرگى جاعدايدا ناۋقاستىڭ جاعدايى تۇراقتى، ناركوزدان تولىعىمەن وياندى. سالىنعان بۇيرەك تولىعىمەن جۇمىس ىستەپ تۇر. قازىر ەكى ليتردەن استام ءزار شىعىپ وتىر. بۇل دەگەنىمىز بۇيرەك ءوز جۇمىسىن ورىنداپ دەنەدەن بارلىق ۋلى زاتتاردى شىعارۋدا. بولاشاقتا بۇيرەك ءدال وسىلاي دۇرىس جۇمىسىن اتقارۋىن جالعاستىرسا، ناۋقاسقا گەموديالەز مۇلدەم قاجەت بولمايدى»، - دەيدى تۇركىستان وبلىستىق كلينيكالىق اۋرۋحاناسىنىڭ باس دارىگەرى جانبولات دىلدابەكوۆ.
رەتسەپيەنتتىڭ جۇبايى پەريزات ءابدرايموۆا كۇيەۋىنە بۇيرەگىن بەرۋگە 1 ايدان بەرى دايىندالىپ، اناليز تاپسىرىپ جۇرگەن.
بەلارۋس رەسپۋبليكاسىندا بۇيرەك اۋىستىرۋ وتاسىن جاساۋعا 30 ميلليون تەڭگەدەن استام اقشا سۇراعان كورىنەدى.
دارىگەرلەر التى بالانىڭ اكەسى دارحان وسپانوۆقا حابارلاسىپ، «سىزگە دونور تابىلدى» دەپ ايتقاندا ولار بۇعان سەنبەپتى.
كەيىن جەرگىلىكتى دارىگەر حابارلاسىپ، راستاعان سوڭ، بىردەن زاتتارىن جيناپ، جولعا شىققان.
«اناليز كەلگەنشە وسى كلينيكانىڭ الدىندا قوندىم. اللادان قاتتى تىلەدىم. بىزگە بۇيىردى. جۇرەگىممەن سەزدىم. 3-4 ادامدى شاقىردى. كىمدىكى سايكەس كەلەدى ەكەن دەپ ۇلكەن ۇمىتپەن كۇتىپ وتىردىق. كەشە ساعات ەكى جارىمدا قورىتىندىسى كەلگەننەن كەيىن دارىگەر ءبارىمىزدى شاقىرىپ، كىمدىكى قانشا پايىز سايكەس كەلەتىنىن ايتتى. بىردەن وپەراتسياعا الىپ كەتتى»، - دەيدى ناۋقاستىڭ جۇبايى پەريزات ءابدرايموۆا.
مايىتتىك دونوردىڭ اعزا مۇشەسىن الىپ، مۇقتاج ادامدارعا سالۋ تۇركىستان وبلىسىندا العاش رەت جاسالىپ وتىر.
دارىگەرلەر 18 جاسار جىگىتتىڭ ەكىنشى بۇيرەگىن استاناعا جىبەرىپ، 16 جاسار بالاعا سالدى.
ال، باۋىرى الماتى قالاسىنىڭ تۇرعىنىنا بۇيىرسا، جۇرەگى 58 جاستاعى شىمكەنتتىك ەر ادامعا سالىندى.
اۆتور
قايرات زاينيشيەۆ