تۇركىستاندا ورتا ازيادا تەڭدەسى جوق «ەسكەك ەسۋ» ارناسى اشىلدى
تۇركىستان. KAZINFORM - تۇركىستان قالاسىندا ورتا ازيادا تەڭدەسى جوق سپورت كەشەندەرى بار «ەسكەك ەسۋ» ارناسى پايدالانۋعا بەرىلدى، دەپ حابارلايدى تۇركىستان وبلىسى اكىمىنىڭ باسپا ءسوز قىزمەتى.
مەملەكەت باسشىسى قاسىم-جومارت توقايەۆ قازاقستان حالقىنا ارناعان جولداۋىندا «سپورت ينفراقۇرىلىمىن دامىتۋ مەن جاڭا كەشەندەردى سالۋ» جونىندە ناقتى تاپسىرمالار بەردى. وسى باعىتتا وبلىستا 112 سپورت نىسانىنىڭ قۇرىلىسى جۇرگىزىلىپ جاتىر. بۇل تەك ينفراقۇرىلىمدى دامىتۋ عانا ەمەس، جاستاردىڭ بولاشاعىنا سالىنعان ينۆەستيتسيا، تۇرعىنداردىڭ سالاۋاتتى ءومىر سالتىن قالىپتاستىرۋعا جاسالعان ناقتى قادام.
بىرەگەي سپورت نىسانىنىڭ اشىلۋ سالتاناتىنا وراي «Turkistan Water Fest - Sky Lights» اتتى اۋقىمدى مادەني-سپورتتىق ءىس-شارا ءوتتى. سالتاناتتى شاراعا ارنايى كەلگەن تۋريزم جانە سپورت ءمينيسترى ە. مىرزابوسىنوۆ، ەسۋ سپورتى تۇرلەرى بويىنشا «قايىق» فەدەراتسياسى ا ق ب پرەزيدەنتى ا. مەرعاليەۆ، بايداركا مەن كانوە ەسۋ حالىقارالىق فەدەراتسياسىنىڭ پرەزيدەنتى ت. كونيەتسكو ءسوز الىپ، ءوڭىر تۇرعىندارىنا ىزگى تىلەگىن جەتكىزدى.
سونىمەن قاتار ماڭىزدى شاراعا تۇركىستان وبلىسىنىڭ اكىمى نۇرالحان كوشەروۆ قاتىسىپ، كوپشىلىكتى جاڭا نىساننىڭ اشىلۋىمەن قۇتتىقتادى.
- بۇگىن ءبىز ءۇشىن تاريحي جانە قۋانىشتى كۇن. ەلىمىزدە العاش رەت حالىقارالىق ستاندارتقا ساي كەلەتىن «ەسكەك ەسۋ» كانالىن اشقالى تۇرمىز. تۇركىستانىمىز تۇركى الەمىن تاڭعالدىراتىن تاعى دا ءبىر زاماناۋي نىسانمەن تولىققالى تۇر. بۇل مەملەكەت باسشىسىنىڭ تىكەلەي تاپسىراماسىنا سايكەس، تاريحي تۇركىستاندى دامىتۋ باعىتىنداعى جۇرگىزىلىپ جاتقان ناقتى جۇمىستاردىڭ جەمىسى. بيىل پرەزيدەنتىمىز «تۇركىستان قالاسىنىڭ ەرەكشە مارتەبەسى تۋرالى» ارنايى زاڭعا قول قويدى. قابىلدانعان زاڭدا تۇركىستان قالاسىنىڭ رۋحاني، تاريحي-مادەني، تۋريستىك ورتالىعى جانە ساۋلەت مۇراسى رەتىندەگى ەرەكشە مارتەبەسى بەكىتىلدى. قاسيەتتى تۇركىستاندى رۋحاني عانا ەمەس، ءبىلىم مەن عىلىمنىڭ، مادەنيەت پەن سپورتتىڭ ورتالىعىنا اينالدىرۋ - مەملەكەتىمىزدىڭ باستى ماقساتىنىڭ ءبىرى. بۇگىنگى سالتانات ءىس-شارا - سول ماقساتتىڭ ايقىن دالەلى، - دەدى نۇرالحان ورالباي ۇلى.
اكىمنىڭ سوزىنشە، «ەسكەك ەسۋ» كانالىنىڭ ەرەكشەلىگىنىڭ ءبىرى - قالانىڭ ەكوجۇيەسىنە دە تىكەلەي اسەرىن تيگىزەدى.
- كەشەندە ازيالىق جانە الەمدىك دەڭگەيدەگى جارىستاردى ۇيىمداستىرۋعا بولادى. شەت ەلدىك سپورتشىلارعا جىل ون ەكى اي وقۋ-جاتتىعۋ جيىندارىن وتكىزۋگە تولىق مۇمكىندىك بار. بۇل سپورت كەشەنى - تۇركىستاننىڭ عانا ەمەس، تۇتاس قازاق ەلىنىڭ ابىرويىن كوتەرەدى. «ەسكەك ەسۋ» كانالى ءوڭىر سپورتىنىڭ دامۋىنا سەرپىن بەرىپ قانا قويماي، تۇركىستاننىڭ تۋريستىك الەۋەتىن ارتتىرۋعا دا زور ۇلەس قوسادى. مەملەكەت باسشىسى «ەلىمىزدىڭ كەلەشەگى - ويى ۇشقىر، ءبىلىمى تەرەڭ، كوزقاراسى زاماناۋي جاستاردىڭ قولىندا» دەگەن بولاتىن. ەندەشە، جاستارىمىز مىقتى بولسا - ەلىمىز دە قۋاتتى بولادى. سوندىقتان جاستاردى سالاۋاتتى ءومىر سالتىن ۇستاۋعا، تۇراقتى تۇردە سپورتپەن اينالىسۋعا شاقىرامىن. بارشاڭىزدى تۇركىستان قالاسىنداعى زاماناۋي نىساننىڭ اشىلۋىمەن شىن جۇرەكتەن قۇتتىقتايمىن! بۇل سپورت ورتالىعىنان بولاشاق وليمپيادا چەمپيوندارى شىعا بەرسىن، - دەدى ايماق باسشىسى.
بۇگىن حالىقارالىق بايداركا جانە كانوە ەسۋ فەدەراتسياسىنىڭ پرەزيدەنتى توماس كونيەتسكو مەن قازاقستان رەسپۋبليكاسى «قايىق» فەدەراتسياسىنىڭ پرەزيدەنتى اسلانبەك مەرعاليەۆ اراسىندا ەكىجاقتى مەموراندۋمعا قول قويىلدى. ناتيجەسىندە، ورتالىق ازيا مەملەكەتتەرى اراسىنداعى العاشقى وڭىرلىك حاب قۇرىلماق.
«ەسكەك ەسۋ» كانالىندا 500 گە جۋىق سپورتشى بايداركا مەن كانوەدا ەسۋ، اكادەميالىق ەسۋ، ترياتلون، پاراكانوە، اشىق سۋدا ءجۇزۋ سياقتى سپورت تۇرلەرىمەن تۇراقتى تۇردە جاتتىعا الادى. وبلىستىڭ ەسكەك ەسۋشىلەرى ەل ابىرويىن كوتەرىپ كەلەدى. وسى ۋاقىتقا دەيىن قازاقستان رەسپۋبليكاسىنىڭ چەمپيوناتتارى مەن كۋبوكتارىندا 1800 دەن استام مەدال يەلەنسە (406 التىن، 730 كۇمىس، 676 قولا)، الەم جانە ازيا چەمپيوناتتارىندا 184 مەدال قانجىلادى (58 التىن، 84 كۇمىس، 42 قولا). وليمپيادا ويىندارىنا 9 ليتسەنزيا الىندى.
بۇل كۇنى ش. قالداياقوۆ اتىنداعى وبلىستىق فيلارمونيانىڭ كونسەرتتىك باعدارلاماسى ۇسىنىلدى. مەرەكەلىك كەشتى دينارا ءساتجان، ەركەبۇلان مىرزابەك، مارات ورالعازين جۇرگىزدى. كەشتىڭ اجارىن مۇقاسان شاحزادايەۆ، مارحابا ءسابي، كاليفارنيا، اقسۇڭقار، DJ Macarello، تۇركىستان مۋزىكالىق تەاترى بيشىلەرى، «تاڭبا» ەتنو توبى جانە «سامعاۋ» بي ءانسامبلى اشىپ، ونەرلەرىن پاش ەتتى.
سونىمەن قاتار وبلىس ورتالىعىندا مەرەكەلىك اتموسفەرا ورناپ، مىڭ بۇرالعان بيشىلەر، انيماتورلار مەن سيرك ونەرپازدارى كەشەندى ارالاپ، كەلۋشىلەردىڭ كوڭىل كوتەردى. «Taiqazan» ۇلتتىق تاعامداردىڭ گاسترونوميالىق جارمەڭكەسى، قولونەرشىلەر كورمەسى، اۋە شارلارى شوۋى، كرەاتيۆتى فوتوزونالار، 10 عا جۋىق ماستەر-كلاسس، ويىن-ساۋىق ايماقتارى ۇيىمداستىرىلىپ، سۋ ۇستىندەگى سپورتتىق ويىندار مەن قويىلىمدار، فلايبورد شوۋى، لازەرلى جانە فونتان شوۋلارى، مەرەكەلىك وتشاشۋ كوپشىلىكتى ءتانتى ەتتى.
وسى كۇنى وبلىس باسشىسى «ەسكەك ەسۋ» ارناسىنىڭ جاتتىعۋ زالىن ارالاپ، قولونەرشىلەر كورمەسى مەن «Taiqazan» گاستروفەستيۆالىن تاماشالادى.
ايتا كەتەيىك، بيىل 102 سپورت نىسانى پايدالانۋعا تاپسىرىلدى. كەلەسى جىلى 10 سپورت عيماراتىن تاپسىرۋ جوسپارلانىپ وتىر. وبلىستاعى ەرەكشە قاجەتتىلىگى بار ازاماتتاردى سالاۋاتتىلىققا تارتۋ ماقساتىندا بەيىمدەلگەن 22 سپورت سەكتسياسى اشىلدى. تۇركىستاندا زاماناۋي «تۇركىستان ارەنا» ستاديونى، حالىقارالىق تەننيس ورتالىعى جانە بەكزات ساتتارحانوۆ اتىنداعى سپورت كەشەنى قىزمەت ەتىپ جاتىر.
بۇدان بولەك، قىسقى سپورت تۇرلەرىن دامىتۋ ماقساتىندا «مۇز سارايى» اشىلدى. وبلىس تاريحىندا العاش رەت شايبالى حوككەي، مانەرلەپ سىرعاناۋ جانە شورت-ترەك ۇيىرمەلەرىمەن 400 دەن استام جاس ءوسپىرىم اينالىسىپ كەلەدى.
سونىمەن قاتار تۇركىستان قالاسىندا اتشابار كەشەنىنىڭ قۇرىلىسى قارقىندى جۇرگىزىىپ جاتىر. بۇل نىسان ات سپورتى تۇرلەرىن دامىتۋعا، ۇلتتىق ءداستۇردى جاڭعىرتۋعا زور مۇمكىندىك بەرەدى.