تۇركىستانعا كەلگەن تۋريستەردىڭ كوبىنە نەگە كوڭىلى تولمايتىنى بەلگىلى بولدى

تۇركىستان. KAZINFORM - تۇركىستان وبلىسىنا جىل باسىنان بەرى 15 مىڭ شەتەلدىك تۋريست كەلگەن. جۇرگىزىلگەن ساۋالنامادا جالپى كەلۋشىلەردىڭ باسىم كوپشىلىگى قىزمەت ساپاسى مەن اجەتحاناعا شاعىم جاساعان.

بۇل تۋرالى تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆ وبلىس اكىمىندە وتكەن اپپارات ماجىلىسىندە مالىمدەدى.

تۇركىستان وبلىسىنا كەلۋگە قىزىعۋشىلىق تانىتاتىندار قاتارى كۇن ساناپ ارتىپ كەلەدى. تۇركى الەمىنىڭ تۋريستىك استاناسى اتانعان كيەلى وڭىردە سوعان ساي تۋريستىك جوبالار قولعا الىنباق. بۇگىن وبلىس اكىمى دارحان ساتىبالدىنىڭ توراعالىعىمەن وتكەن اپپارات ماجىلىسىندە وسى جانە باسقا دا تۋريستىك قىزمەتتەر تالقىلاندى. وبلىس باسشىسى بۇل سالانى قىسقا ۋاقىتتا جانداندىرۋدى، كەمشىلىكتەرمەن جۇمىس ىستەۋدى قاتاڭ تاپسىردى. سونىمەن قاتار اۋدان، قالا اكىمدەرىنە كيەلى نىسانداردىڭ تازالىعىن ساقتاۋدى ايتىپ، سول اۋماقتاعى جول بەلگىلەرى مەن جارىقتاندىرۋ ماسەلەسىن شەشۋدى جۇكتەدى.

«ءبىزدىڭ وبلىسقا تۋريستەردى تارتۋدىڭ بىردەن ءبىر جولى، ولارعا ساپالى ءارى دۇرىس قىزمەت كورسەتە الۋ دەپ ويلايمىن. بۇل ءبىزدىڭ ەڭ ءبىرىنشى مىندەتىمىز بولۋى ءتيىس. بۇدان بولەك جاڭا جوبالار قولعا الىنىپ، جان-جاقتى قىزىقتىرۋىمىز كەرەك. ماۋسىم ايىندا مەملەكەت باسشىسى تۋريزم ماسەلەلەرى بويىنشا جيىن وتكىزىپ، ءبىرقاتار تاپسىرما بەرگەن بولاتىن. قىسقا مەرزىمدە تۋريستىك ونىمدەر مەن تۋريستەر سانىن ارتتىرۋ ءۇشىن كۇلتوبە قالاشىعى مەن قولونەرشىلەر قالاسى جوباسىن جۇزەگە اسىرىپ، ەكوتۋريزمدى دامىتۋ قاجەت. سونىمەن قاتار ۇلتتىق قۇندىلىقتارعا نەگىزدەلگەن شەبەرلىك ساعاتتارى، ۇلتتىق ويىندار مەن تاعامداردى ۇسىنىڭىزدار. سەرۆيس دەڭگەيىن جاقسارتۋ ماقساتىندا تۋريستىك بيزنەس وكىلدەرىن وقىتۋ جۇمىستارىن تۇراقتى جۇرگىزىڭىزدەر»، - دەدى دارحان ساتىبالدى.

تۇركىستان وبلىسى اكىمىنىڭ ءبىرىنشى ورىنباسارى زۇلپىحار جولداسوۆتىڭ ايتۋىنشا اتالعان سالاعا جان-جاقتى تالداۋ جۇرگىزىلگەن. سونىمەن قاتار وتاندىق تۋريزم ماماندارى مەن ساراپشىلاردىڭ ۇسىنىستارى تىڭدالىپ، ءبىرقاتار جوبالار جوسپارلانعان. جالپى كەلۋشىلەردىڭ اراسىندا ساۋالنامادا جۇرگىزىلگەن. قورىتىندىسىندا قىزمەت ساپاسى مەن اجەتحاناعا دەگەن شاعىم كوپ تۇسكەن.

«الەمدىك تەندەنتسيانى ەسكەرە وتىرىپ، ءتۋريزمدى دامىتۋ بارىسىندا ەكولوگيالىق تازا جوبالار قولدانىلادى. ونىڭ ءبىرى -ۆيزيت ورتالىقتار. ەلىمىزدە بۇل جوبانىڭ ءتيىمدى كەيستەرى بار. وبلىستا وسىنداي ورتالىقتاردى جۇزەگە اسىرۋ ۇسىنىلىپ وتىر»، - دەدى زۇلپىحار جولداسوۆ.

اۆتور

قايرات زاينيشيەۆ