تۇركىستان وبلىسىنىڭ شارۋالارى قاقاعان قىستا ليمون جيناپ جاتىر
تۇركىستان وبلىسىنداعى جىلىجايلاردا ليمون ءپىستى، دەپ حابارلايدى Kazinform.
تۇركىستان وبلىسىندا ليمون ءوسىرۋ كەڭ ەتەك الا باستادى. ارنايى جىلىجايدا ءوسىرىلىپ جاتقان تروپيكالىق جەمىس قىس ورتاسىندا ءپىسىپ، مول ءونىم بەرىپ جاتىر.
ماسەلەن، سارىاعاشتاعى «دايان» شارۋا قوجالىعىنىڭ يەسى وسپانالى تاڭسىقبايەۆتىڭ ليمون ءوسىرۋدى قولعا العانىنا بيىل 10 جىلعا جۋىق ۋاقىت بولدى. 60 سوتتىق جەرگە 640 ليمون اعاشىن وتىرعىزعان شارۋا كۇنى-ءتۇنى كۇتىم جاساپ، باپتادى. تامىر جايۋىن تاۋلىك بويى باقىلادى. ەرەن ەڭبەكتىڭ ناتيجەسىندە تروپيكالىق بەلدەۋدە عانا وسەتىن جەمىس اعاشى سارىاعاش توپىراعىنا جەرسىندى. بۇگىنگى كۇنى شارۋا ليمون القابىنان مول ءونىم الىپ وتىر.
«قازىر دالادا كۇن سۋىق. ال جىلىجاي ىشىنە كىرسەڭىز جىپ-جىلى. ليمون ءوسىپ تۇر. ءيىسىنىڭ ءوزى كەرەمەت» - دەيدى وسپانالى تاڭسىقبايەۆ.
جالپى تاڭسىقبايەۆتاردىڭ وتباسىلىق كاسىبى كول-كوسىر پايداعا كەنەلتىپ وتىر. شارۋاشىلىقتىڭ جۇمىسىمەن اعايىندى ەكەۋى اينالىسادى. ال تەرىم ناۋقانىندا ونعا جۋىق تۇرعىندى جۇمىسقا الادى. ساتۋ ىسىمەن دە شارۋانىڭ ءوزى شۇعىلدانادى. ماسكەۋ، الماتى، استاناعا دەيىن بارىپ، ساتىپ كەلگەن كەزدەرى بار. ودان بولەك، كامازبەن كەلىپ ارتىپ كەتەتىن الىپساتارلار دا كوپ. ال ورداباسىلىق شارۋا باقىتجان وتانبايەۆ 5 گەكتار جەردەن 40 توننادان استام ءونىم جينادى. ءقازىر ليمونداردى الىس-جاقىن قالالارعا ساۋداعا شىعارىپ جاتىر.
«ەلنۇر-ايدار» شارۋا قوجالىعىنا قاراستى 5 گەكتار جەر تەلىمىنىڭ 4 گەكتارىنا الما، 0,5 گەكتارىنا ليمون، ال قالعان القاپقا قۇلپىناي ەكتىك. جىلىجايعا 707 دانا ليمون، 6 مىڭ ءتۇپ قىزىل المانىڭ كوشەتىن وتىرعىزدىق. قازىر 6 ادامدى تۇراقتى جۇمىسپەن قامتىپ وتىرمىز»، - دەيدى شارۋا.