تۇركىستان وبلىسىنداعى تراسسالارعا بلوكبەكەتتەر قويىلىپ جاتىر

تۇركىستان وبلىسىندا قار قۇرساۋىندا قالعان 31 جولاۋشىعا كومەك كورسەتىلدى، دەپ حابارلايدى Kazinform.

كۇن رايىنىڭ كۇرت سۋىتۋىنا بايلانىستى تۇركىستان وبلىسىنداعى جولدار جابىلۋدا. قازىرگى كەزدە «الماتى-تاشكەنت-تەرمەز» اۆتوجولىنىڭ 601 شاقىرىمىنداعى شاقپاق اۋىلىنىڭ ماڭى مەن 654 شاقىرىمىنداعى ماشات اسۋىندا 2 بلوكبەكەت ورناتىلدى. سونداي-اق بايدىبەك اۋدانى اۋماعىنداعى وبلىستىق ماڭىزى بار شايان- اعىبەت، شايان- اقباستاۋ، شايان- مىڭبۇلاق، شايان-بىرلىك-كەڭەستوبە اۆتوجولدارى جابىلىپ، قوسىمشا 4 بلوكبەكەت قويىلدى.

وڭىردە ءتارتىپ ساقشىلارى مەن توتەنشە جاعداي ماماندارى كۇشەيتىلگەن رەجيمدە جۇمىس ىستەپ جاتىر. جول بويىندا اداسىپ قالعان جانە اۆتوكولىكتەرى قاردا تۇرالاپ قالعان جولاۋشىلارعا كومەكتەسۋدە. ماسەلەن، رەسپۋبليكالىق ماڭىزى بار «الماتى-تاشكەنت-تەرمەز» اۆتوجولىنىڭ 635 شاقىرىمىنداعى قاراشىق اۋىلى ماڭىندا 6 جولاۋشىمەن تۇركىستاننان الماتىعا شىققان «Toyota Alphard» كولىگى جانە 5 جولاۋشىسى بار 3 جەڭىل اۆتوكولىك قار قۇرساۋىنان شىعارىلدى.

بايدىبەك اۋدانى اۋماعىندا جول ورتاسىندا تۇرىپ قالعان 17 جۇرگىزۋشىگە كومەك كورسەتىلىپ، 6 كولىك كەرى قايتارىلدى.

«تۇركىستان وبلىسى پوليتسيا دەپارتامەنتىنىڭ باسشىسى مۇرات قابدەنوۆتىڭ تاپسىرماسىمەن 11- جەلتوقساننان باستاپ ماڭىزى بار جولداردا پاترۋلدەۋ مەن اۋا-رايىنىڭ قۇبىلۋىنا بايلانىستى جولاۋشىلارعا كومەك كورسەتۋ جۇمىستارىن تاۋلىك بويى جۇرگىزىلۋدە. ساقشىلار تۇرعىندارعا اۋا- رايىنىڭ قولايسىز بولۋىنا بايلانىستى الىس جولعا شىقپاۋ كەرەكتىگىن ەسكەرتەدى» - دەدى تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتىنىڭ باسشىسى گۇلنار ءابدىجاپپاروۆا.

ايتا كەتەيىك، بۇدان الدىن قاتتى ايازدان تۇركىستان وبلىسىندا جولدار جابىلىپ، مەكتەپتەر ونلاينعا كوشكەنىن جازعان بولاتىنبىز.

سونداي-اق، تۇركىستان وبلىسىنداعى تراسسالاردا 4-جىلىتۋ بەكەتى جۇمىس ىستەپ تۇر.