تۇركىستان وبلىسىندا سۇڭقار تەكتەس قۇستاردىڭ سانى ازايىپ كەتكەن

تۇركىستان. KAZINFORM - ەرەكشە قورعاۋعا الىنعان قۇستاردى زاڭسىز اۋلاۋشىلار جاۋاپقا تارتىلىپ، 700 ا ە ك مولشەرىندە ايىپپۇل تولەيدى. بۇل تۋرالى «وحوتزووپروم ءو ب» قىزىلوردا وڭىرلىك فيليالى باسشىسىنىڭ ورىنباسارى نۋريددين قاسىموۆ مالىمدەدى.

1-تامىز-31-قازان ارالىعىندا ەلىمىزدىڭ 12 ايماعىندا «سۇڭقار» كەڭ كولەمدى تابيعاتتى قورعاۋ اكسياسى وتەدى. باستى ماقسات - « قىزىل كىتاپقا» ەنگەن سۇڭقار تەكتەس قۇستاردى ۇيىمداسقان قىلمىستىق توپتاردىڭ زاڭسىز اۋلاۋ قىزمەتىن انىقتاۋ جانە ولاردى قورعاۋ.

«سۇڭقار» كەڭ اۋقىمدى اكسياسى - شىعىس قازاقستان، اباي، جەتىسۋ، اقتوبە، ماڭعىستاۋ، قىزىلوردا، تۇركىستان، قاراعاندى، ۇلىتاۋ، پاۆلودار، جامبىل، الماتى وبلىستارىنىڭ جانە كورشىلەس وبلىستاردىڭ ىرگەلەس اۋداندارىنىڭ اۋماقتارىندا وتەدى. اتالعان وڭىرلەردە سۇڭقار تەكتەس قۇستاردىڭ مەكەن ەتەتىن اۋماقتارىن قورعاۋ جۇمىستارى ۇيىمداستىرىلادى. وعان مەكەمەنىڭ 163 ينسپەكتورى، 80 گە جۋىق ارنايى كولىك، «درون» اپپاراتتارى، تۇنگى كورۋ قۇرىلعىلارى قولدانىلادى. ايتا كەتەرلىگى، قازىرگى تاڭدا مەكەمە تاراپىنان قىزىل كىتاپقا ەنگەن اڭ-قۇستاردى زاڭسىز اۋلاۋمەن اينالىساتىندارعا قارسى ارنايى جەدەل توپ قۇرىلدى»، - دەدى نۋريددين قاسىموۆ.

ال، تۇركىستان وبلىسىنىڭ ورمان شارۋاشىلىعى جانە جانۋارلار دۇنيەسى ايماقتىق ينسپەكسياسىنىڭ باس مامانى زايىر ۇستەنوۆتىڭ ايتۋىنشا، وبلىس اۋماعىندا ورنالاسقان اقسۋ- جاباعىلى جانە قاراتاۋ قورىقتارىندا سۇڭقار تەكتەس قۇستار ءومىر سۇرەدى. دەگەنمەن، سوڭعى جىلدارى اتالعان قۇستاردىڭ سانى كۇرت ازايىپ كەتكەن. قازىرگى تاڭدا قورىقتاردا 100-150 جۇپ قانا سۇڭقار تەكتەس قۇس بار. سالا ماماندارى ەرەكشە قورعاۋعا الىنعان قۇستاردى زاڭسىز اۋلاۋشىلار جاۋاپكەرشىلىككە تارتىلىپ، 700 ا ە ك مولشەرىندە ايىپپۇل تولەيتىندىگىن ەسكەرتتى.