تۇركىستان وبلىسىندا قوسىمشا جەر تەلىمدەرىندە شەگىرتكەگە قارسى دارىلەۋ شارالارى جۇرگىزىلەدى

استانا. KAZINFORM - وڭدەلگەن 260 مىڭ گەكتاردان باسقا، وڭىردە 50 مىڭ گەكتاردان استام تارالۋ ۋچاسكەلەرى انىقتالدى.

قوسىمشا وڭدەۋ تۇركىستان وبلىسىنىڭ ارىس قالاسىندا، سارىاعاش، كەلەس، ورداباسى جانە شاردارا اۋداندارىندا جۇرگىزىلەدى. بۇل تۋرالى ۇكىمەتتىڭ باسپا ءسوز قىزمەتى حابارلادى.

8-ماۋسىمدا شەگىرتكەنىڭ تارالۋىنا قارسى ءىس- قيمىل جونىندەگى ورتالىق جەدەل شتاب وتىرىسىندا ۆيتسە- پرەمەر سەرىك جۇمانعارين وڭىرلەردەگى جاعداي تۋرالى باياندامالاردى تىڭدادى.

تۇركىستان وبلىسى اكىمدىگىنىڭ اقپاراتى بويىنشا، قوسىمشا وڭدەۋ 70 بىرلىك جەرۇستى تەحنيكاسىنىڭ كومەگىمەن جۇرگىزىلۋدە، وعان قوسا قوسىمشا 4 ۇشاق كەلدى. قازىرگى ۋاقىتتا بارلىق قاجەتتى تەحنيكا كوكونىس- باقشا داقىلدارى القاپتارىنىڭ اينالاسىندا شوعىرلانعان. بۇگىنگى تاڭدا ەگىستىككە زيان كەلگەن جوق.

اقتوبە وبلىسىنىڭ ايتەكە بي اۋدانىندا شەگىرتكە دەرناسىلدەرى كوبەيە باستادى. وڭدەۋگە ارنالعان تەحنيكا دايىن. جالپى وبلىستا 76 بىرلىك تەحنيكانى پايدالانا وتىرىپ، ءوڭىردىڭ 12 اۋدانىندا 281 مىڭ گەكتار جەرگە حيميالىق وڭدەۋ جۇرگىزىلدى. شەگىرتكەنىڭ پايدا بولۋ ورىندارىن تەكسەرۋ جانە انىقتاۋ ءۇشىن 600 گە جۋىق ادام تارتىلدى. ولار فيتوسانيتاريالىق ينسپەكتسيا، اكىمدىك قىزمەتكەرلەرى جانە ۋاقىتشا قىزمەتكەرلەر. شەگىرتكەنىڭ بەلسەندى ءوسۋ كەزەڭىندە جۇمىستى كۇشەيتۋ ءۇشىن اكىمدىككە تاعى 14 بىرلىك تەحنيكا قاجەت.

قوستاناي وبلىسىنىڭ بەس اۋدانىندا 29,4 مىڭ گا اۋماقتا حيميالىق وڭدەۋ جۇرگىزىلدى. دەرناسىلدەردىڭ كوبەيۋ ورىندارىنا مونيتورينگ جاساۋ جانە انىقتاۋ ءۇشىن 129 تەكسەرۋشى جانە 326 ۋاقىتشا قىزمەتكەر تارتىلدى. 72 بىرلىك تەحنيكا ءازىر تۇر. شەگىرتكەگە قارسى كۇرەس جۇمىستارى فەرمەرلەرمەن بىرلەسىپ جۇرگىزىلىپ جاتىر.

«ءبىز بيىلعىداي شەگىرتكەنىڭ تارالۋ ايماعىن بۇرىن- سوڭدى كەزدەستىرگەن ەمەسپىز. ءبىز ونىڭ تارالۋىنىڭ ىقتيمال سالدارىن جەتە باعالامايمىز. ا ش م مەملەكەتتىك ينسپەكتسيا كوميتەتىنە بارلىق راسىمدىك ماسەلەلەردى دەرەۋ اياقتاۋدى جانە بارلىق قاجەتتى تەحنيكانى اتالعان وڭىرلەرگە جىبەرۋدى تاپسىرامىن. قاربالاس ۋاقىتتا ءبىز شتاب وتىرىسىن اپتاسىنا ەكى رەت وتكىزەتىن بولامىز»، - دەپ تۇيىندەدى سەرىك جۇمانعارين.