تۇركىستان وبلىسىندا قاسىم، جومارت، كەمەل ەسىمدى ۇشەم دۇنيەگە كەلدى

تۇركىستان. KAZINFORM - كەلەس اۋدانى، اباي اۋىلىنىڭ 33 جاستاعى تۇرعىنى 7 قىزدان كەيىن ۇشەم بوسانىپ، 10 بالانىڭ اناسى اتاندى.

ۇشەمدەردىڭ اتا-اناسى كوپتەن كۇتكەن ۇلدارىنا قاسىم، جومارت ەسىمدەرىن بەردى، ال قىزىن كەمەل دەپ اتادى.

گۇلناز مىڭجاسار مەرزىمىنەن بۇرىن -جۇكتىلىكتىڭ 33-اپتاسىندا بوسانعان. كەيبىر قارسى كورسەتكىشتەرگە بايلانىستى كوپبالالى اناعا وتا جاسالعان. اكەسى باقىت مىڭجاسار قۇرىلىستا جۇمىس ىستەيدى. ال اناسى جۇمىسسىز. شالا تۋعان بالالاردىڭ سالماعى 2000 گرامم شاماسىندا بولعان.

«وتا جاساعان جانە جالپى №1 پەريناتالدىق ورتالىعىنىڭ اكۋشەرلىك بلوگىنا ۇلكەن العىسىمدى بىلدىرەمىن. مەديتسينالىق مەكەمەلەردە قولايلى جاعداي جاساپ، زاماناۋي جابدىقتارمەن قاماتاماسىز ەتكەنى ءۇشىن جانە مامانداردىڭ جوعارى كاسىبيلىگى ءۇشىن العىسىم شەكسىز. ەسىمدەرىن پرەزيدەنتىمىز سياقتى ۇلكەن ازامات بولسىن دەگەن ىرىممەن قاسىم، جومارت، كەمەل دەپ قويدىق»، - دەدى ۇشەمنىڭ اناسى گۇلناز مىڭجاسار.

ايتا كەتەيىك، بۇدان بۇرىن كەنتاۋلىق 28 جاستاعى كەلىنشەك ۇشەم بوسانعان بولاتىن.