تۇركىستان وبلىسىندا جىل باسىنان بەرى 14 قىزدى الىپ قاشىپ كەتكەن
تۇركىستان. KAZINFORM - وڭتۇستىك وڭىردە قىز الىپ قاشۋدى قالىپتى جاعداي سانايتىندار كوپ. جىل باسىنان بەرى تۇركىستان وبلىسىندا 14 جىگىت قىز ۇرلاعان.
تۇركىستان وبلىسىنىڭ پوليتسيا دەپارتامەنتىندە وتكەن جىلدىڭ 8 ايىندا قىز الىپ قاشۋ دەرەگىمەن 16 ءىس تىركەلگەن. ال، بيىل بۇل باعىتتا 14 وقيعا بولدى.
دەپارتامەنتتىڭ باسپا ءسوز حاتشىسى گۇلنار ابدۋجاپپاروۆانىڭ ايتۋىنشا، جابىرلەنۋشىلەردىڭ كەشىرىم بەرۋىنەن نەمەسە ەكى تاراپ تاتۋلاسىپ، وتباسى قۇرۋىنا بايلانىستى تىركەلگەن ءىستىڭ ءبارى قىسقارىپ كەتكەن.
ەلدى ەلەڭ ەتكىزگەن قىز الىپ قاشۋ وقيعاسىنىڭ ءبىرى وتكەن جىلى شىمكەنتتە تىركەلدى. ەڭگەزەردەي جىگىتتىڭ بويجەتكەندى كوتەرىپ الىپ، كولىكتىڭ ىشىنە سالعان ءساتى كوشەدەگى كامەرالاردىڭ بىرىنە ءتۇسىپ قالعان. سودان سوڭ بەلگىسىز باعىتقا قاراي ءجۇرىپ كەتكەن.
كەيىن اتالعان ۆيدەو الەۋمەتتىك جەلىدە جاريالاندى. پوليتسيا اۆتوكولىكتى جارتى تاۋلىك ىشىندە الماتى-سامارا تاسجولىنداعى جالاعاش اۋىلىنىڭ ماڭىندا ۇستادى. تەرگەۋ اياقتالعان سوڭ جاڭاوزەن قالاسىنان ۇيلەنۋ ماقساتىندا كەلگەن جىگىت 4 جىلعا سوتتالدى.
تۇركىستان وبلىستىق ءماسليحاتىنىڭ دەپۋتاتى قاليما جانتورەيەۆا ۇيلەنۋدىڭ ەكى ءتۇرى بار دەپ ەسەپتەيدى. ءبىرىنشىسى - ەكى جاقتىڭ كەلىسىمى ارقىلى جاس جۇبايلاردىڭ وتاۋ قۇرۋى، ەكىنشىسى - جابايىلىقپەن ماجبۇرلەپ اكەلۋ.
«جالپى قىز الىپ قاشۋدى سالت-ءداستۇر دەپ قابىلدايتىندار كوپ. ءبىراقتان بۇگىنگى كۇنى بۇل قىلمىس قوي. ەگەر قىز جاقتىڭ اتا- اناسى كەلىسىم بەرىپ، جاستار ءوزارا ءتىل تابىسىپ، ولاردىڭ ۇيلەنۋىنە ەشكىم قارسى بولماسا، قىزدى الىپ كەتۋىنە بولادى. بۇل الىپ قاشۋ ەمەس. ونى كوپشىلىككە ايتىپ جەتكىزگەن كەزدە دە «الىپ قاشىپ كەتىپتى» دەپ ەمەس، «ۇيلەنىپتى»، «وتاۋ قۇرىپتى» دەپ ايتۋ كەرەك. ال، الىپ قاشۋ دەگەن - دورەكىلىك. قىزدى سىيلاماۋ. ەشقاشان كورمەگەن، بىلمەگەن ادامىڭدى قويشا كوتەرىپ، كولىككە سالىپ اكەتۋ - ناداندىق. بۇل وتباسىلار تۇبىندە ءتىل تابىسا المايدى دەپ ويلايمىن»، - دەيدى قاليما جانتورەيەۆا.
جاسىراتىنى جوق، بۇگىندە قىزداردىڭ ومىرىندە كورمەگەن ادامعا جار بولىپ جاتقان وقيعالار دا بار.
«بۇل وتە اۋىر جاعداي. قىزدارىمىزدى قۇرمەتتەۋىمىز كەرەك. اسىرەسە، ەر ازاماتتار قىزدىڭ پىكىرىمەن ساناسۋعا ءتيىس. الىپ قاشقان قىزدى الىپ قالۋ ءۇشىن الدىنا جاتىپ الاتىن اپالاردىڭ دا بار ەكەنىن ەستىپ ءجۇرمىز. بۇل - جاس قىزعا الىمجەتتىك كورسەتۋ. سوندىقتان ءاربىر قىز ۇرلاۋشى زاڭ اياسىندا قاتاڭ جازالانۋعا ءتيىس»، - دەيدى دەپۋتات.
ال، پوليتسيا قىزمەتكەرلەرى قىز الىپ قاشۋدىڭ جازاسى اۋىر بولاتىنىن جەتكىزدى.
«قىلمىستىق كودەكستىڭ 125-بابىندا ادام ۇرلاعاندارعا ءتورت جىلدان جەتى جىلعا دەيىن باس بوستاندىعىنان ايىرۋ جازاسى بەلگىلەنگەن. ال وسى كودەكستىڭ 126-بابى بويىنشا ادامدى ونى ۇرلاۋعا بايلانىستى ەمەس باس بوستاندىعىنان زاڭسىز ايىرۋدىڭ جازاسى - ءۇش جىلعا دەيىن باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ»، - دەيدى گۇلنار ابدۋجاپپاروۆا.
جالپى سوڭعى كەزدە ەل ىشىندە «قىلمىستىق كودەكسكە قىز الىپ قاشقاندارعا بولەك جازا ەنگىزۋ كەرەك، ۇيلەنۋ ءۇشىن قالىڭدىق ۇرلاۋ مەن ادام ۇرلىعىن بولەك قاراۋ كەرەك» دەگەن پىكىر دە ايتىلىپ ءجۇر. بۇل بويىنشا زاڭگەردىڭ ويىن بىلدىك.
«شىنىن ايتقاندا، بيلىك بەرسە بويداقتىڭ بارلىعى قىز الىپ قاشايىن دەپ تۇر. ولاردىڭ ىشىندە قىز بالاسىنىڭ ەرتەڭگى بولاشاعىن ويلاپ وتىرعاندارى از. سورىنا دا قالۋى مۇمكىن. وزگە ءۇيدىڭ تابالدىرىعىن اتتاپ قويعان سوڭ كەي قىزدار „ۇياتتان“ نەمەسە „ەلدىڭ اڭگىمەسىنەن كەيىن“ ۇيىنە كەتىپ قالا المايدى. بولاشاعىن سول جىگىتتىڭ جولىنا ارنايدى. ال، ءبىز وركەنيەتتى ەلگە اينالىپ كەلەمىز. سوندىقتان قىز الىپ قاشۋدىڭ جازاسىن جەڭىلدەتۋ دەگەن پىكىردى قولدامايمىن. سەبەبى، بۇل دا — ادام ۇرلىعى. قايتا قىز الىپ قاشۋشىلارعا جازانى اۋىرلاتۋ قاجەت» ، — دەيدى زاڭگەر اسقار ەرىنبەتوۆ.
ايتا كەتەيىك، بۇدان الدىن تارازدا قىز الىپ قاشپاق بولعان جىگىتتەردىڭ سوتتالعانىن جازعان بولاتىنبىز.