تۇركىستان وبلىسىندا جۇك پويىزى اۋدارىلىپ، وتقا وراندى

استانا. KAZINFORM - تۇركىستان وبلىسىندا جۇك پويىزى اۋدارىلىپ، وتقا وراندى، - دەپ حابارلايدى «الماتى» تەلەارناسى.

تۇلكىباس اۋدانىنداعى اپات كەشكى ساعات 19:30 دا بولعان. رەسمي اقپارعا سۇيەنسەك، مەڭلىباي - كوكتەرەك ارالىعىنداعى جولدا جۇك پويىزىنىڭ ۆاگوندارى رەلستەن شىعىپ كەتكەن. زارداپ شەككەندەر جوق. ال اپات سالدارىن جويۋ ءۇشىن وقيعا ورنىنا شىمكەنت ستانتسياسىنان قالپىنا كەلتىرۋ جانە ءورت ءسوندىرۋ پويىزدارى جىبەرىلگەن.

«تۇلكىباس - ارىس ۋچاسكەسىندە جۇك ۆاگوندارى جولدان شىعىپ كەتكەن جەردە پويىز قوزعالىسى قالپىنا كەلتىرىلدى. كەشىكتىرىلگەن پويىزداردىڭ جولاۋشىلارى تاماق جانە اۋىزسۋمەن قامتاماسىز ەتىلدى. 492 جولاۋشىنى جەتكىزۋ ءۇشىن 5 اۆتوبۋس ۇيىمداستىرىلدى. سونداي-اق، جۇك ۆاگوندارى جولدان شىعىپ كەتۋى سالدارىن جويۋعا 3 قالپىنا كەلتىرۋ پويىزى جانە 100 دەن اسا تەمىرجولشى جۇمىلدىرىلدى»، - دەدى «قازاقستان تەمىر جولى» ۇ ق» ا ق باسپا ءسوز حاتشىسى ناريمان دۇيسەكوۆ.

ايتا كەتەيىك، بۇعان دەيىن ون باعىتتاعى پويىز توقتاتىلعان. جولاۋشىلار تاسىمالدايتىن ۆاگوندار تەك تاڭعى ساعات 04:00 شاماسىندا جولعا شىقتى. جەكە ۆاگونداعى دوڭگەلەك جۇبى ءوسىنىڭ سىنۋى اپاتقا سەبەپ بولۋى مۇمكىن.