تۇركىستان وبلىسىندا شومىلۋ ماۋسىمى باستالماي جاتىپ 7 بالا سۋعا كەتكەن

تۇركىستان. KAZINFORM - وبلىستا جىل باسىنان بەرى 9 ادام سۋعا كەتىپ، قايتىس بولدى. ونىڭ ىشىندە كامەلەتكە تولماعان 7 جاس ءوسپىرىم بار. بۇل تۋرالى تۇركىستان وبلىسى توتەنشە جاعدايلار دەپارتامەنتىنىڭ ازاماتتىق قورعانىس باسقارماسىنىڭ باستىعى ورازگەلدى دۇيسەن مالىمدەدى.

توتەنشە جاعدايلار دەپارتامەنتى ماماندارىنىڭ ۇيىمداستىرۋمەن وڭىردەگى بارلىق مەكتەپتەردە «سۋداعى قاۋىپسىزدىك ەرەجەلەرى» تاقىرىبىندا اشىق ساباقتار وتكىزىلىپ جاتىر.

سونداي-اق، ءار مەكتەپكە ارنايى قاۋىپسىزدىك بۇرىشتارى ورناتىلعان.

سونىمەن قاتار، اتا-انالار جينالىستارىندا سۋداعى قاۋىپسىزدىك بويىنشا ارنايى نۇسقامالاردى تانىستىرۋ جۇمىستارى جۇرگىزىلۋدە.

الەۋمەتتىك جەلىلەردە جانە اتا-انالار كوميتەتىنىڭ، وقۋشىلاردىڭ WhatsApp توپتارىنا اقپاراتتىق سيپاتتاعى جادىنامالار، بەينەروليكتەر، كەڭىنەن تاراتىلىپ جاتىر.

«جالپى وڭىردە 4334 سۋ ايدىنى بار. ولاردىڭ قاتارىندا 42 سۋ قويما، 149 وزەن، 25 كول، 2870 كانال جانە 1248 قاشىرتقى بار. وبلىستىق ءماسليحاتتىڭ شەشىمىمەن وڭىردە 111 شومىلۋعا قاۋىپتى ايماق بەكىتىلگەن. قازىرگى تاڭدا ول مەكەندەرگە ەسكەرتپەلەر قويىلدى»، - دەدى ورازگەلدى دۇيسەن.

اۆتور
قايرات زاينيشەۆ