تۇركىستان وبلىسىندا دارىلىك وسىمدىك قازعان شەتەلدىكتەر ۇستالدى
تۇركىستان. KAZINFORM - تۇركىستان وبلىسىندا دارىلىك وسىمدىك «كەۋرەك» جيناپ جۇرگەن شەتەل ازاماتتارى انىقتالدى. زاڭسىز ارەكەتتەر ارىس قالاسىنا قاراستى مونتايتاس جانە قوجاتوعاي اۋىلدىق وكرۋگتەرىنىڭ دالالى ايماقتارىندا تىركەلدى.
تابيعي رەسۋرستار جانە تابيعات پايدالانۋدى رەتتەۋ باسقارماسى، تابيعات قورعاۋ پروكۋراتۋراسى، وبلىستىق پوليتسيا جانە ارىس قالالىق اكىمدىگى ماماندارىنان قۇرالعان جۇمىس توبى ارنايى رەيد ۇيىمداستىرعان.
تەكسەرۋ بارىسىندا شەكارانى زاڭسىز كەسىپ وتكەن ءۇش شەتەلدىك شاتىر تىگىپ، قازان- وشاق دايىنداپ، كەۋرەك وسىمدىگىن قازۋعا تولىق دايىندالعانى بەلگىلى بولدى.
- بۇل ارەكەتتەر زاڭسىز بولىپ تابىلادى. جايىلىمدىق جەردىڭ يەسىنە قاتىستى ءتيىستى اكت تولتىرىلسا، شەتەل ازاماتتارى ارىس اۋداندىق پوليتسيا بولىمىنە تاپسىرىلدى. ولار زاڭ شەڭبەرىندە جاۋاپقا تارتىلادى، - دەلىنگەن تۇركىستان وبلىسى اكىمدىگىنىڭ اقپاراتىندا.
ارىس قالالىق جەر قاتىناستارى ءبولىمى جايىلىمدىق القاپتاردى زاڭسىز قازۋ نەمەسە ءبۇلدىرۋ زاڭمەن قاتاڭ جازالاناتىنىن ەسكەرتەدى. ال، اكىمدىك وكىلدەرى بۇل باعىتتاعى باقىلاۋ مەن رەيدتىك شارالار جالعاساتىنىن حابارلادى.
ايتا كەتەيىك، بۇدان بۇرىن تۇركىستان وبلىسىندا قۋاڭشىلىق سالدارىنان ەگىستىك كۇيىپ، مال ازىعى قىمباتتاعانىن جازعان بولاتىنبىز.