تۇركىستان وبلىسىندا بوكستان ءابدىسالان نۇرماحانوۆ اتىنداعى حالىقارالىق جارىس باستالدى
استانا. KAZINFORM - تۇركىستاندا داڭقتى بوكسشى، ك س ر و-عا ەڭبەك سىڭىرگەن سپورت شەبەرى، كەزىندە قازاقستان ۇلتتىق قۇراماسىن باپتاعان باپكەر ءابدىسالان نۇرماحانوۆتى ەسكە الۋعا ارنالعان بوكستان ەرەسەكتەر اراسىندا كەزەكتى 30- حالىقارالىق تۋرنير جالاۋىن كوتەردى.
تۇركىستان وبلىسى اكىمىنىڭ باسپا ءسوز قىزمەتى ءمالىم ەتكەندەي، بوكس باسەكەسىنە ەلىمىزدىڭ 15 ايماعىنان جانە كورشىلەس وزبەكستان، قىرعىزستان، تاجىكستان جانە الىستاعى كامبودجا مەملەكەتىنەن ىرىكتەلگەن 145 بىلعارى قولعاپ شەبەرى 13 سالماق دارەجەسىندە مىقتىلاردى انىقتايدى.
ءداستۇرلى تۋرنيردىڭ سالتاناتتى اشىلۋ راسىمىندە تۇركىستان قالاسىنىڭ اكىمى نۇربول تۇراشبەكوۆ پەن ءابدىسالان اعانىڭ جۇبايى كۇلپاش شايمەردەنوۆا جارىسقا قاتىسۋشى سپورتشىلاردى قۇتتىقتاپ، بارشاسىنا ساتتىلىك تىلەدى.
ايتۋلى بوكس باسەكەسىن تۇركىستان وبلىسىنىڭ اكىمدىگى مەن وبلىستىق دەنە شىنىقتىرۋ جانە سپورت باسقارماسى، وبلىستىق جوعارى سپورت شەبەرلىگى مەكتەبى جوعارى دارەجەدە ۇيىمداستىردى. حالىقارالىق دەڭگەيدەگى بوكس دوداسى جايىندا تۇركىستان وبلىستىق جوعارى سپورت شەبەرلىگى مەكتەبىنىڭ ديرەكتورى شىنبولات رايحانوۆ جان-جاقتى بايانداپ بەردى.
حالىقارالىق جارىس 18-24-شىلدە ارالىعىندا وتەدى.
ايتا كەتەيىك، تۋرنير «Olympic Center» سپورت كەشەنىندە ءوتىپ جاتىر.
اۆتور
كۇنسۇلتان وتارباي