تۇركىستان وبلىسىندا اپتاپ ىستىق پەن شەگىرتكەنىڭ تاراۋى جاعدايدى قيىنداتىپ بارادى - ۇكىمەت

استانا. قازاقپارات - 10-ماۋسىم كۇنى ۇكىمەتتە پرەمەر-ءمينيستردىڭ ورىنباسارى سەرىك جۇمانعاريننىڭ توراعالىعىمەن وتكەن ورتالىق جەدەل شتاب وتىرىسىندا وڭىرلەردەگى وتكەن دەمالىس كۇندەرىندەگى شەگىرتكەنىڭ تارالۋىنا قاتىستى جاعداي تالقىلاندى.

بۇل تۋرالى ۇكىمەتتىڭ باسپا ءسوز قىزمەتى حابارلادى.

بەلسەندى تارالۋ كەزەڭىندە زيانكەستەرمەن كۇرەستىڭ ءاربىر كۇنى وتە ماڭىزدى. سوندىقتان ورتالىق جەدەل شتاب اپتاسىنا ەكى رەت وتىرىس وتكىزۋگە كوشتى. بارلىق وڭىرلەر قارقىندى جۇمىس رەجيمىندە: احۋال ۇنەمى باقىلاۋعا الىنعان جانە وڭدەۋدى كۇشەيتۋ قاجەت جەرلەرگە تەحنيكا مەن پەستيتسيدتەردىڭ قوسىمشا كولەمى دەرەۋ جەتكىزىلۋدە.

تۇركىستان وبلىسىندا اپتاپ ىستىق پەن شەگىرتكەنىڭ قوسىمشا 60 مىڭ گەكتار القاپقا تارالۋى جاعدايدى قيىنداتىپ وتىر. 10-ماۋسىمداعى جاعداي بويىنشا ونىڭ 45,3 مىڭ گەكتارى وڭدەلدى: ارىستا - 36,8 مىڭ گەكتار، شاردارا اۋدانىندا - 6,7 مىڭ گەكتار، كەلەس اۋدانىندا - 1,6 مىڭ گەكتار.

پرەمەر-ءمينيستردىڭ ورىنباسارى سەرىك جۇمانعارين ۇيىمداستىرۋ جۇمىستارىن جەدەل باسقارۋ ءۇشىن جەتىسۋ وبلىسىنا، اۋىل شارۋاشىلىعى ءمينيسترى ايداربەك ساپاروۆ تۇركىستان وبلىسىنا، اۋىل شارۋاشىلىعى ۆيتسە-مينيسترلەرى قوستاناي جانە اقتوبە وبلىستارىنا جۇمىس ساپارىمەن بارادى.

سونداي-اق اۋىل شارۋاشىلىعى مينيسترلىگىنىڭ 46 قىزمەتكەرى تۇركىستان وبلىسىنا ءىسساپارعا جىبەرىلدى، ولار وڭدەۋگە ءتيىستى جەرلەردى انىقتاۋ ماقساتىندا اۋماقتاردى زەرتتەۋدە. زيانكەستەردىڭ تارالۋ ايماقتارى انىقتالعان جاعدايدا حيميالىق زاتتاردىڭ ەكى ەسەلەنگەن دوزاسىمەن قايتا وڭدەۋ جۇمىستارى جۇرگىزىلەدى.

اۆتور
ايدار وسپاناليەۆ