تۇركىستان وبلىسىندا انا ءولىمى ەكى ەسەگە وسكەن

فوتو: فوتو: ۆيكتور فەديۋنين / Kazinform

تۇركىستان. KAZINFORM - وڭىردە قاتەرلى ىسىكتەن 600 دەن استام ادام قايتىس بولعان.

تۇركىستان وبلىسىندا 2023 -جىلى ەكى انا ءولىمى تىركەلسە، 2024 -جىلى بۇل كورسەتكىش 4 كە كوبەيگەن. ال، نارەستەلەر ءولىمىنىڭ دەڭگەيى 404 تەن 364 كە تومەندەپ وتىر.

جالپى وڭىردە قاتەرلى ىسىكتەردەن بولاتىن ءولىم كورسەتكىشى 742 دەن 669 عا، قان اينالىم اۋرۋلارىنان بولاتىن ءولىم-ءجىتىم 2042 دەن 1958 گە، تۋبەركۋلەزدەن بولاتىن ءولىم-ءجىتىم 8 دەن 5 كە ازايعان.

ءوڭىر تۇرعىندارىن ءدارى- دارمەكپەن قامتۋ بويىنشا وتكەن جىلى 15,9 ميلليارد تەڭگەگە دارىلىك زاتتار مەن مەديتسينالىق بۇيىمداردىڭ 549 ءتۇرىن ساتىپ الۋعا ءوتىنىم بەرىلگەن. ال، وبلىستاعى مەديتسينالىق مەكەمەلەردىڭ تەحنيكامەن جاراقتاندىرىلۋى 85,22 پايىزدى قۇرادى.

- وبلىستاعى 3 پەريناتالدىق ورتالىقتىڭ ءارقايسىسىندا «ۇرىقتى قورعاۋ ورتالىقتارى» جۇمىسى جولعا قويىلعان. ورتالىقتاردا «ءبىر كۇندىك كلينيكا» جوبالارى ىسكە قوسىلدى. مۇندا جۇكتى ايەلدەر ءبىر كۇندە پەريناتالدىق دياگنوستيكانىڭ بارلىق تۇرلەرىنەن ءوتىپ، زەرتتەۋلەردىڭ جىلدام ءارى ناقتى ناتيجەلەرىن الا الادى. وتكەن جىلى 23861 كەڭەس بەرىلسە، ونىڭ 23153 ىن جۇكتى ايەلدەر قۇراپ وتىر. ال، 341 ى تۋا بىتكەن اقاۋى بار بالالار بولسا، 367 سى قاۋىپ-قاتەر توبىنداعى ايەلدەر، - دەدى تۇركىستان وبلىستىق دەنساۋلىق ساقتاۋ باسقارماسى باسشىنىڭ ورىنباسارى باۋىرجان ساتىبالدى.

ايتا كەتەيىك، بۇدان بۇرىن تۇركىستان وبلىسىندا ونكولوگيالىق اۋرۋعا شالدىعۋشىلار كوبەيگەنىن جازعان بولاتىنبىز.