«التىنتوبە» ورتا مەكتەبىنىڭ مۇعالىمى ءاليا مياتبەكوۆانىڭ ايتۋىنشا، ءالي 5-6-سىنىپ وقۋشىلارى شەشە المايتىن كۇردەلى ەسەپتەردى باسقالاردان بۇرىن شىعارىپ، كوپشىلىكتى تاڭعالدىرىپ ءجۇر.
جاس ۆۋندەركيندتىڭ اناسى نۇرگۇل مىرزاعاليدىڭ سوزىنشە، ۇلى ەكى جاسىنان باستاپ بالاباقشاعا بارعان. ونىڭ زەرەكتىگى سونشالىق، بالاباقشا تاربيەشىلەرى «ءوز قاتارلاستارىنا قاراعاندا وزىق بالا» دەپ مەكتەپكە جىبەرگەن.
- ءۇش جاسقا تولار تۇستا ءالي بالاباقشاعا بارۋعا اسا قۇلىق تانىتا قويمادى. وسىدان سوڭ مەكتەپكە دەيىنگى دايىندىق توبىنا بەردىك. العاشىندا بالانىڭ بەيىمدەلۋىنە ۋاقىت بەرىپ، باقىلاپ كورگىمىز كەلدى. ەگەر قيىندىق تۋىنداسا، قايتادان بالاباقشاعا بەرۋدى ويلاعانبىز. ءبىراق وزىنەن ۇلكەن سىنىپ وقۋشىلارىمەن بىرگە مەكتەپكە بارىپ جۇرسە دە، ەش قينالماي، ساباققا تەز بەيىمدەلدى. بيىلعى قىركۇيەكتەن باستاپ دايىندىق ساباعىنا قاتىسىپ كەلەدى، - دەدى ول.
اناسىنىڭ ايتۋىنشا، باسقا بالالار مۋلتفيلم كورسە، ءالي اعىلشىن تىلىندەگى ماتەماتيكالىق كونتەنتتەردى قىزىعىپ تاماشالايدى.
- ۇيىقتار الدىندا ەرتەگى تىڭداۋدىڭ ورنىنا، جارتى ساعات بويى ەسەپ شىعارىپ، كوبەيتۋ كەستەسىن ايتۋدى وتىنەدى. سۋرەت سالعاندى ۇناتادى. كۋبيكتەرمەن عيماراتتاردى قۇراستىرعانعا اۋەستىگى بار. «شاحمات وينايىق» دەپ اعالارىنا جيى ايتادى، - دەدى ول.
ءالي تەك ماتەماتيكامەن شەكتەلمەيدى. ول الىپپەنى تولىق مەڭگەرگەن، ەندى اعىلشىن تىلىندە جازۋدى ۇيرەنۋگە كۇش سالىپ ءجۇر.
- ءالي دۇنيەگە كەلگەننەن بەرى سالت-ءداستۇردى دارىپتەيتىن «وتباسى حرەستوماتياسى» كىتابىن ءوزىمىز دە تەرەڭدەتىپ وقىپ، ونداعى ءتورت قاتار ولەڭدەردى جاتتاتىپ كەلەمىز. اۋىلدا تۇرعاندىقتان، قالاداعىداي دامىتۋ مۇمكىندىكتەرى قاراستىرىلماعان. دەگەنمەن، ماتەماتيكا ءپانىنىڭ مۇعالىمى قوسىمشا ساباقتارىنا قاتىستىرىپ ءجۇر. ال ونلاين وقۋعا بالانىڭ جاسى ءالى ەرتە دەپ ەسەپتەيمىز. سوندىقتان بۇل باعىتتا ازىرگە ناقتى جوسپار جوق، - دەدى اناسى.
دارىندى بالانىڭ اكەسى ساپار - ەكونوميست مامان، قازىرگى ۋاقىتتا جەكە كاسىپكەرلىكپەن اينالىسادى. اناسى نۇرگۇل - مەكتەپتە اعىلشىن ءتىلى ءپانىنىڭ مۇعالىمى. وتباسى بەس ۇل، ءبىر قىز تاربيەلەپ وتىر.
ۇلكەن ۇلدارى IT سالاسى بويىنشا ءبىلىم الىپ ءجۇر. ودان كەيىنگى ۇلى تۋريزم سالاسىندا اعىلشىن تىلىندەگى توپتا وقيدى. ول فيزيكا-ماتەماتيكا باعىتىنداعى «دارىن» مەكتەبىن ءتامامداعان. قالعان ءتورت بالاسى مەكتەپ وقۋشىلارى، ءتۇرلى پاندەر بويىنشا ۇزدىك ناتيجە كورسەتىپ كەلەدى.
بۇدان بۇرىن الماتىلىق جاس ونەرتاپقىش مينيسترلىكپەن بىرلەسىپ «اۋادان سۋ الۋ» جوباسىن ىسكە قوساتىنىن جازعان ەدىك.