تۇركىستان وبلىسىندا 240 مىڭ توننا كوكونىس ەگەتىن ەڭ ءىرى جىلىجاي كەشەنى سالىنادى
استانا. KAZINFORM - قازاقستان پرەمەر- ءمينيسترى ولجاس بەكتەنوۆ «ەكو- كۋلتۋرا» اگروونەركاسىپتىك حولدينگىنىڭ پرەزيدەنتى الەكساندر رۋداكوۆپەن اۋىل شارۋاشىلىعى سالاسىنداعى ىنتىماقتاستىق ماسەلەلەرىن تالقىلادى.
كۇن تارتىبىندەگى ماسەلە - اگرارلىق ازىق-تۇلىك قاۋىپسىزدىگىن قامتاماسىز ەتۋ جونىندەگى بىرلەسكەن جوبالاردى ىسكە اسىرۋ. بۇل تۋرالى ۇكىمەتتىڭ باسپا ءسوز قىزمەتى مالىمدەدى.
حولدينگ تۇركىستان وبلىسى كەلەس اۋدانىندا جىلىجاي كەشەنىن سالىپ جاتىر. بۇگىنگى تاڭدا 51 گ ا جەر ۋچاسكەسىندە جىلىجاي اشۋدىڭ ءبىرىنشى كەزەڭى جۇزەگە اسىرىلۋدا، وندا جىلىنا 28 مىڭ توننادان استام قىزاناق وسىرىلەتىن بولادى.
«كەزدەسۋگە قاتىسۋشىلار 500 گ ا جەردى قامتيتىن جىلىجاي كەشەنىنىڭ اۋماعىن كەڭەيتۋ جوباسىن تالقىلادى. بۇل جىل بويى 240 مىڭ توننادان استام كوكونىس وسىرۋگە مۇمكىندىك بەرەدى. وندىرىلەتىن ءونىم ىشكى نارىققا جەتكىزىلەدى، سونداي- اق لوگيستيكالىق جانە تاراتۋ ورتالىقتارىنىڭ كەلىسىلگەن ارنالارى ارقىلى شەتەلگە ەكسپورتتالادى. جوبانىڭ ءبىرىنشى كەزەگىن كەلەسى جىلدىڭ سوڭىنا دەيىن پايدالانۋعا بەرۋ جوسپاردا بار»، - دەلىنگەن حابارلامادا.
الەكساندر رۋداكوۆتىڭ ايتۋىنشا، بۇل الەمدەگى ەڭ ءىرى جىلىجايلاردىڭ ءبىرى بولماق. مۇندا 7 مىڭ جۇمىس ورنىن اشۋ كوزدەلگەن. «ەكو- كۋلتۋرا» حولدينگى جەرگىلىكتى تۇرعىندار ءۇشىن باسەكەگە قابىلەتتى ەڭبەك جاعدايىن تۋدىرىپ، الەۋمەتتىك جاۋاپكەرشىلىك شەڭبەرىندە ءوڭىردىڭ دامۋىنا ەلەۋلى ۇلەس قوسادى.
ۇكىمەت باسشىسى اگروونەركاسىپ كەشەنىن دامىتۋدىڭ ماڭىزدىلىعىنا توقتالدى.
«ازىق-تۇلىك قاۋىپسىزدىگى، تۇرعىنداردى ساپالى ءارى ارزان ونىمدەرمەن قامتاماسىز ەتۋ - ۇكىمەت جۇمىسىنىڭ نەگىزگى باسىمدىعى. ءوسىپ كەلە جاتقان دەموگرافيالىق كورسەتكىشتەردى ەسكەرە وتىرىپ، بۇكىل الەمدە ازىق-تۇلىككە دەگەن قاجەتتىلىك تۇراقتى تۇردە ارتىپ كەلەدى. بىزدە ىشكى نارىقتى قامتاماسىز ەتىپ، ءونىمدى ەكسپورتتاۋعا تولىق مۇمكىندىك بار. بۇگىندە ءبىز ىشكى قاجەتتىلىكتى تولىق قامتاماسىز ەتە وتىرىپ، اۋىل شارۋاشىلىعى سالاسىن جاڭا دەڭگەيگە كوتەرۋدى جانە ەكسپورت كولەمىن ودان ءارى ارتتىرۋدى ماقسات ەتىپ وتىرمىز. اتالعان باعىتتا ءبىز ينۆەستورلاردى تارتۋعا مۇددەلىمىز جانە اۋقىمدى جوبالاردى ىسكە اسىرۋعا قولداۋ كورسەتۋگە دايىنبىز»، - دەپ اتاپ ءوتتى ولجاس بەكتەنوۆ.