تۇركىستان قالاسىنىڭ جاڭا بولىگىندە قارساق ءجۇر - ۆيدەو
جەرگىلىكتى تۇرعىندار قالا ىشىندە جۇرگەن تۇلكىگە ۇقساس قوس اڭدى سۋرەتكە ءتۇسىرىپ الدى، دەپ حابارلايدى Kazinform.
الەۋمەتتىك جەلىدە تۇركىستان قالاسىنىڭ ورتالىعىندا جۇرگەن اڭنىڭ ۆيدەوسى تارادى. جاڭا قالا اۋماعىنداعى كوپ قاباتتى ۇيلەردىڭ ماڭىندا تۇلكىگە ۇقساس قوس اڭدى جەرگىلىكتى تۇرعىندار ۆيدەوعا ءتۇسىرىپ العان.
ال، «سىرداريا- تۇركىستان» مەملەكەتتىك وڭىرلىك تابيعي پاركىنىڭ عىلىمي قىزمەتكەرى عاني نازاربەك قالا ورتالىعىندا جۇرگەن قوس اڭنىڭ قارساق ەكەندىگىن ايتتى.
«ولار تۇلكى ەمەس، قارساقتار. بۇرىن جاڭا قالا سالىنباي تۇرعان ساتتە ول جەر قارساقتاردىڭ مەكەن ەتۋ ايلاعى بولعان. ال، قازىر جاڭا قالانىڭ سالىنعانىنا 5 جىلدىڭ ءجۇزى بولدى. وعان دەيىن قارساقتار سول جەردى مەكەن ەتكەن. ءالى كۇنگە دەيىن سول ماڭدا ولاردىڭ ىندەرى بار. ياعني، كونە زاماننان كەلە جاتقان تۇراقتى مەكەندەرى. سوندىقتان، ءبىز ولارعا تاڭ قالماۋىمىز كەرەك، قايتا ولار «مىنالار قايدان پايدا بولدى» دەپ بىزگە تاڭعالىپ ءجۇر عوي»، - دەيدى ول.