تۇركىستان - اجىراسۋ دەڭگەيى ەڭ تومەن ءوڭىر

استانا. KAZINFORM - اجىراسۋ بويىنشا ەلىمىزدە شىعىس قازاقستان وبلىسى كوش باستادى. مۇندا 1000 ادامعا شاققاندا اجىراسۋ كوەففيتسيەنتى 3,12 گە جەتكەن.

- جۇپتاردىڭ اجىراسۋىنا ءارتۇرلى سەبەپتەر اسەر ەتەدى. ءبىز بۇل ماسەلەنى الەۋمەتتانۋلىق زەرتتەۋلەر ارقىلى تالدايمىز. 2023 -جىلى وسى تاقىرىپتا ارنايى الەۋمەتتىك زەرتتەۋ جۇرگىزدىك. انكەتادا وتباسىلىق ومىرگە قاتىستى ءتۇرلى سۇراقتار قويدىق. ناتيجەسىندە ەڭ باستى سەبەپ - قارجىلىق قيىندىقتار ەكەنى انىقتالدى. ەكىنشى ورىندا - ۇستانىمداردىڭ وزگەرۋى، بىرگە تۇرۋ مادەنيەتىنىڭ قيىندىعى، وتباسى مۇشەلەرىمەن كەلىسپەۋشىلىك. سونىمەن قاتار الەۋمەتتىك- ەكونوميكالىق سەبەپتەر ىشىمدىككە سالىنۋ، قۇمار ويىندارعا جەتەلەيتىن فاكتور ەكەنى بەلگىلى بولدى، - دەيدى وتباسى جانە گەندەرلىك ساياسات سالاسىنداعى زەرتتەۋلەر ورتالىعىنىڭ ساراپشىسى اقنۇر يمانقۇل «بۇگىن LIVE» باعدارلاماسىنا بەرگەن سۇحباتىندا.

سوڭعى ستاتيستيكا بويىنشا ەلىمىزدەگى اجىراسقاندار سانى 40,5 مىڭعا جەتكەن. ولاردىڭ t,4 ى قالالىق جەردە تۇراتىندار.

- سوڭعى ستاتيستيكاعا سۇيەنسەك، اجىراسۋ كورسەتكىشى تومەندەپ كەلەدى. مىسالى، 2019 -جىلى اجىراسۋ كوەففيتسيەنتى 3,23 بولسا، 2023 -جىلى ول 2,01 گە دەيىن تومەندەدى. ءبىراق نەكەگە تۇرۋ كورسەتكىشى دە ازايدى. مۇنى قازىر وتباسىن قۇراتىن جاسقا جەتكەندەردىڭ سانىمەن تۇسىندىرۋگە بولادى. ەلىمىزدە 90-جىلداردان كەيىن تۋۋ دەڭگەيى تومەندەگەن. جاستاردىڭ جاڭا ۇستانىمدارى دا اسەر ەتىپ جاتىر، - دەيدى ستۋديا قوناعى.

اجىراسۋدىڭ ەڭ تومەنگى دەڭگەيى تۇركىستان وبلىسىندا. ونداعى وتباسىلاردىڭ ەكىگە ايىرىلۋى 1000 ادامعا شاققاندا 0,90 كوەففيتسيەنتىن كورسەتكەن.

- زەرتتەۋ بارىسىندا جاستاردان ء«سىز ءۇشىن ەڭ باستى قۇندىلىق نە؟» دەپ سۇرادىق. ناتيجەگە سايكەس، وتباسى - جاستار ءۇشىن ءالى دە ەڭ ماڭىزدى قۇندىلىق. الەۋمەتتىك مەديانىڭ وتباسىنداعى كيكىلجىڭگە دە ىقپالى بار. ءبىراق ول اسا ۇلكەن فاكتور ەمەس. دەگەنمەن، كەڭەيتىلگەن وتباسىلاردى زەرتتەۋ كەزىندە الەۋمەتتىك جەلىگە بايلانىستى كوممۋنيكاتسيانىڭ ازايىپ بارا جاتقانى بايقالدى. «بىزبەن از سويلەسەدى» نەمەسە «ەرلى-زايىپتىلار تەلەفوندى كوپ پايدالانادى» دەگەن جاۋاپتار ايتىلدى، - دەيدى وتباسى جانە گەندەرلىك ساياسات سالاسىنداعى زەرتتەۋلەر ورتالىعىنىڭ ساراپشىسى.

الەۋمەتتىك ساراپشى جاستاردىڭ وتباسىلىق ءبىلىمىن ارتتىرۋ كەرەكتىگىن دە جەتكىزدى.

- 2024 -جىلى مادەنيەت جانە اقپارات مينيسترلىگىنىڭ باستاماسىمەن استانا مەن شىمكەنتتە نەكەگە تۇرۋعا ءوتىنىش بەرگەن جاستار اراسىندا وتباسىنا دايىندىق بويىنشا پيلوتتىق جوبا ءوتتى. 32 قاتىسۋشى قامتىلدى. ناتيجەسىندە جاستاردى وتباسىلىق ومىرگە دايىنداۋ كوبىرەك جۇرگىزىلۋى كەرەك دەگەن قورىتىندىعا كەلدىك. جاس جۇپتارعا زاڭناما، قارجىلىق ساۋاتتىلىق، رەپرودۋكتيۆتى دەنساۋلىق، تسيفرلىق ساۋاتتىلىق بويىنشا ءبىلىم بەرۋ قاجەت. بۇل باعىتتاعى كۋرس، سەمينار، ترەنينگتەردى جالعاستىرۋ ۇسىنىلدى. ءقازىر وسى ۇسىنىستار قاراستىرىلىپ جاتىر، - دەيدى اقنۇر يمانقۇل.

ايتا كەتەيىك، پرەزيدەنت قازاقستاندىقتاردى وتباسى كۇنىمەن قۇتتىقتادى.