بۇل تۋرالى تۇركىستان وبلىسىنىڭ اكىمدىگى Kazinform اگەنتتىگىنىڭ رەسمي ساۋالىنا بەرگەن جاۋابىندا مالىمدەدى.
قوجا احمەت ياساۋي كەسەنەسىنەن وڭتۇستىككە قاراي 350 مەتر جەردە ورنالاسقان كۇلتوبە قالاشىعىنىڭ تاريحى ب. ز. د. III عاسىردان باستالادى. مۇندا اشىق اسپان استىنداعى زاماناۋي ارحەولوگيالىق پارك قۇرۋ جوسپارلانعان.
رەسمي مالىمەتكە سايكەس، «ازىرەت سۇلتان» قورىق- مۇراجايىنىڭ اۋماعىن اباتتاندىرۋ جانە قالاشىققا كۇمبەز ورناتۋ جۇمىستارى 2021 -جىلى باستالعان. كەيىن ارحەولوگيالىق پاركتىڭ قۇرىلىسىن 2024 -جىلى اياقتاۋ جوسپارلانعانى حابارلاندى. الايدا قالاشىق اۋماعىن تولىق اباتتاندىرۋ جۇمىستارى ءالى اياقتالعان جوق.
تۇركىستان وبلىسى اكىمدىگىنىڭ مالىمەتىنشە، 2021-2025 -جىلدارى «ازىرەت سۇلتان» قورىق-مۇراجايىنىڭ اۋماعىن اباتتاندىرۋ» جوباسى اياسىندا ءتورت كۇمبەز ورناتىلعان. مەردىگەر — «Bazis Construction» ج ش س. قۇرىلىس جۇمىستارى 2025 -جىلى اياقتالىپ، نىسان مەملەكەتتىك قابىلداۋ اكتىسىمەن قابىلدانعان.
ال ءتورت كۇمبەز ورنالاسقان اۋماقتى قوسا العاندا، جالپى كولەمى 8,9 گەكتار بولاتىن كۇلتوبە قالاشىعىن اباتتاندىرۋ ءۇشىن جاڭا جوبا ازىرلەندى.
— وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى تاراپىنان جوبالاۋ-سمەتالىق قۇجاتتاما ازىرلەنىپ، 2026 -جىلعى قىركۇيەكتە مەملەكەتتىك ساراپتامانىڭ وڭ قورىتىندىسى الىندى. جوبانىڭ قۇنى — 3,6 ميلليارد تەڭگە، — دەلىنگەن اكىمدىك جاۋابىندا.
جوبا اياسىندا ۆيزيت-ورتالىق، مۋزەي جانە كادەسىي پاۆيلوندارى، سۋبۇرقاقتار، اقپاراتتىق تاقتالار، جارىقتاندىرۋ باعانالارى، كولەڭكەلى گالەرەيالار مەن جارنامالىق قالقاندار ورناتۋ قاراستىرىلعان.
— قازىرگى ۋاقىتتا جوبانى ىسكە اسىرۋ ءۇشىن يۋنەسكو- نىڭ كەلىسىمىن الۋ ماقساتىندا اكىمدىك تاراپىنان «اسەردى باعالاۋ ەسەبىن» ازىرلەۋ جۇمىستارى جۇرگىزىلىپ جاتىر. كەلىسىم الىنعاننان كەيىن جوبا قولدانىستاعى زاڭناما تالاپتارىنا سايكەس ىسكە اسىرىلادى، — دەپ حابارلادى وبلىس اكىمدىگى.