سايرام اۋدانى اكىمىنىڭ ورىنباسارى شۋحراتۋللا ۋبايدۋللايەۆ پەن اۋداندىق جەر قاتىناستارى ءبولىمىنىڭ باسشىسى امانگەلدى جۇنىسبەكوۆكە قاتىستى قىلمىستىق ءىستى تۇركىستان قالاسىنىڭ اۋدانارالىق سوتى قارادى. ءىس سوتقا كەلىسىمدىك ءىس جۇرگىزۋ تارتىبىمەن تۇسكەن.
قوس شەنەۋنىككە ادامدار توبىنىڭ الدىن الا ءسوز بايلاسۋىمەن پارا الۋ جانە پارا بەرۋگە وقتالۋ بويىنشا ايىپ تاعىلعان.
سوت مالىمەتىنشە، شۋحراتۋللا ۋبايدۋللايەۆ 650 مىڭ تەڭگە پارا العانى ءۇشىن كىنالى دەپ تانىلىپ، وعان 22 ميلليون 750 مىڭ تەڭگە ايىپپۇل تاعايىندالدى. بۇعان قوسا، پارا رەتىندە بەرگەن 3 ميلليون تەڭگەسى ءۇشىن وعان 56 ميلليون 250 مىڭ تەڭگە ايىپپۇل سالىندى. سونىمەن قاتار ول مەملەكەتتىك قىزمەتتە لاۋازىم اتقارۋ قۇقىعىنان ءومىر بويىنا ايىرىلدى.
ال امانگەلدى جۇنىسبەكوۆكە 2 ميلليون 131 مىڭ 550 تەڭگە پارا العانى ءۇشىن 74 ميلليون 604 مىڭ 250 تەڭگە ايىپپۇل بەلگىلەندى. بۇدان بولەك، پارا رەتىندە بەرگەن 3 ميلليون تەڭگە ءۇشىن وعان 56 ميلليون 250 مىڭ تەڭگە ايىپپۇل تاعايىندالدى. ول دا مەملەكەتتىك قىزمەتتە لاۋازىم اتقارۋ قۇقىعىنان ءومىر بويىنا ايىرىلدى.
- سوتتالۋشىلار پروكۋراتۋرامەن كىنانى مويىنداۋ تۋرالى پروتسەستىك كەلىسىم جاساعان. سوت ولاردىڭ شىن نيەتپەن وكىنۋى مەن جاس بالالارىنىڭ بولۋىن جەڭىلدەتەتىن، ال كاسىبي انتتى بۇزا وتىرىپ قىلمىس جاساۋىن اۋىرلاتاتىن ءمان-جاي رەتىندە تانىدى، - دەلىنگەن سوت حابارلاماسىندا.
سوت ۇكىمى زاڭدى كۇشىنە ەندى.