بۇل باستاما قازان قالاسىندا ءوتىپ جاتقان يسەسكو باس كونفەرەنتسياسىنىڭ 15-سەسسياسىندا كوتەرىلدى.
2026-جىلعى 13-14 مامىر كۇندەرى ۇيىمداستىرىلعان جيىندا قاتىسۋشىلار ۇيىمنىڭ 2020-2025 -جىلدارداعى قىزمەتىن قورىتىندىلاپ، 2026-2029-جىلدارعا ارنالعان ستراتەگيالىق جوسپارىن قاراستىردى.
كونفەرەنتسيا بارىسىندا ق ر مادەنيەت جانە اقپارات ۆيتسە-ءمينيسترى رۋستام ءالي قازاقستاننىڭ يسلام الەمى مادەني مۇراسىن دامىتۋ باعىتىنداعى جەتىستىكتەرىنە توقتالدى.
- سوڭعى جىلدارى يسەسكو-نىڭ يسلام الەمى مۇرالارى تىزىمىنە قازاقستاننان «توعىزقۇمالاق» ءداستۇرلى ويىنى، «ويۋ- ورنەك» ساندىك-قولدانبالى ونەرى جانە «قارماقشى جىراۋلارى» اۋىزشا پوەزيا مەكتەبى ەنگىزىلدى،- دەدى رۋستام ءالي.
سونىمەن قاتار قازاقستاندىق تاراپ 2026-جىلى الماتى قالاسىندا ءال-فارابي مۇراسىنا ارنالعان II حالىقارالىق كونفەرەنتسيا وتەتىنىن جاريالادى.
اتالعان ءىس-شارا يسەسكو ۇيىمىمەن بىرلەسىپ ۇيىمداستىرىلادى.
ايتا كەتەيىك، يسەسكو باس كونفەرەنتسياسى ءتورت جىلدا ءبىر رەت وتكىزىلەدى. بيىلعى فورۋمعا ۇيىمعا مۇشە 53 مەملەكەتتىڭ وكىلدەرى قاتىسىپ جاتىر.
بۇعان دەيىن ماڭعىستاۋدا ەكى مىڭ جىلدىق كونە قالا ورنىندا ارحەولوگيالىق زەرتتەۋ ءجۇرىپ جاتقانى حابارلاندى.