تۇركيانىڭ ورتالىق بانكى نەگىزگى مولشەرلەمەنى بۇرىنعى دەڭگەيدە قالدىردى
استانا. KAZINFORM - تۇركيانىڭ ورتالىق بانكى ەردوعاننىڭ پايىزدىق مولشەرلەمەلەردى تومەندەتۋ ينفلياتسيانى تومەندەتۋگە ىقپال ەتەدى دەگەن مالىمدەمەسىنە قاراماستان نەگىزگى پايىزدىق مولشەرلەمەنى 50 پايىز دەڭگەيىندە قالدىرۋ تۋرالى شەشىم قابىلدادى.
بۇل تۋرالى Kazinform اگەنتتىگىنىڭ مەنشىكتى ءتىلشىسى حابارلادى.
بانك مالىمدەمەسىندە 2024-جىلدىڭ ناۋرىز ايىندا كەيىنگە شەگەرىلگەن نەگىزگى پايىزدىق مولشەرلەمەنى ۇستاپ تۇرۋ تۋرالى شەشىم بازالىق ينفلياتسيانىڭ تومەندەۋى، ىشكى سۇرانىستىڭ باسەڭدەۋى جانە ينفلياتسيالىق بولجامداردىڭ جاقسارۋى سياقتى بىرنەشە فاكتورلارعا بايلانىستى بولعانى ايتىلعان.
بۇل رەتتە تۇركيانىڭ ورتالىق بانكى ۋاقىتشا فاكتورلاردىڭ اسەرىنەن وڭدەلمەگەن ازىق-تۇلىك ونىمدەرى باعاسىنىڭ ءوسۋى ەلدەگى ينفلياتسيالىق قىسىمنىڭ نەگىزگى سەبەپتەرىنىڭ ءبىرى بولىپ قالا بەرەتىنىن اتاپ ءوتتى. دەگەنمەن، بيلىك بۇل وزگەرىستەردىڭ قىسقا مەرزىمدى ەكەنىنە جانە ۇزاق مەرزىمدى ەكونوميكالىق ماقساتتارعا اسەر ەتپەيتىنىنە سەنىمدى.
تۇركيانىڭ باس قارجى رەتتەۋشىسى ينفلياتسيانىڭ تۇراقتى تومەندەۋى جانە 5 پايىزدىق ماقساتتى دەڭگەيگە جەتكەنشە قاتاڭ اقشا-نەسيە ساياساتىن ۇستاناتىنىن باسا ايتتى. نەسيە جانە دەپوزيت نارىقتارىندا كۇتپەگەن وزگەرىستەر بولعان جاعدايدا ولاردى تۇراقتاندىرۋ بويىنشا قوسىمشا شارالار قابىلداناتىن بولادى.
قاتاڭ نەسيە ساياساتىن جۇرگىزۋ باعانىڭ ءوسۋىن ۇستاپ تۇرۋدى جانە ينۆەستورلاردىڭ تۇرىك ەكونوميكاسىنا سەنىمىن نىعايتۋدى جالعاستىرادى. الايدا، ينفلياتسيالىق ماقساتقا تابىستى قول جەتكىزۋ تەك اقشا-نەسيەلىك شەشىمدەرگە عانا ەمەس، سونىمەن قاتار سىرتقى جانە ىشكى فاكتورلاردىڭ ديناميكاسىنا، ونىڭ ىشىندە الەمدىك ەكونوميكالىق ۇردىستەرگە بايلانىستى بولادى.
قازان ايىندا اقشا-نەسيە ساياساتى كوميتەتىنىڭ وتىرىسىندا ەلدىڭ ورتالىق بانكى دە نەگىزگى پايىزدىق مولشەرلەمەنى 50 پايىز دەڭگەيىندە وزگەرىسسىز قالدىرۋ تۋرالى شەشىم قابىلدادى.
بۇعان دەيىن تۇركيادا جالعان دوللار جاسايتىندار كوبەيىپ كەتكەنى تۋرالى جازعانبىز.