تۇركيانىڭ مالاتيا قالاسىندا 5,9 بالدىق جەر سىلكىنىسى بولدى

استانا. KAZINFORM - تۇركيا ۇكىمەتىنىڭ توتەنشە جاعدايلاردىڭ الدىن الۋ جانە تابيعي اپاتتاردى باسقارۋ باسقارماسىنىڭ (AFAD) حابارلاۋىنشا، جەراستى دۇمپۋلەرى جەرگىلىكتى ۋاقىت بويىنشا ساعات 10.46-دا تىركەلگەن، دەپ جازادى انادولى.

جەر سىلكىنىسىنىڭ وشاعى كالە قالاسىندا 10,7 ك م تەرەڭدىكتە ورنالاسقان. ازاماتتار ۇيلەرى مەن كەڭسەلەرىن تاستاپ، جاقىن ماڭداعى ساياباقتار مەن الاڭدارعا جينالدى. جەراستى دۇمپۋلەرى شانلىۋرفا، ادىيامان، كيليس، گازيانتەپ جانە كاحرامانماراش پروۆينتسيالارىندا دا سەزىلدى. كالەدەگى بىرنەشە بۇلىنگەن عيمارات قورشاۋعا الىنىپ، قاۋىپسىزدىك شارالارى كۇشەيتىلدى.

مالاتيا پروۆينتسياسىنىڭ گۋبەرناتورى سەددار ياۆۋز قازا تاپقاندار تۋرالى مالىمەت جوق ەكەنىن ايتتى. ونىڭ ايتۋىنشا، كالەدە جەر سىلكىنىسى بولعانعا دەيىن سوت ءىسى جالعاسىپ جاتقان عيماراتتاردان باسقا بارلىق اپاتتى عيماراتتار سۇرىلگەن. ياۆۋز بۇل عيماراتتارداعى ادامدار كوپ ۋاقىت بۇرىن قاۋىپسىز جەرگە كوشىرىلگەنىن اتاپ ءوتتى.

«جەلىدە قۇلاعان عيمارات ۆيدەولارى تارادى، ءبىراق بۇل ەسكى ۆيدەولار. ولار عيماراتتاردى ءسۇرۋ كەزىندە تۇسىرىلگەن. سوندىقتان ازاماتتاردان دۇربەلەڭ تۋدىرۋى مۇمكىن جالعان سۋرەتتەردى تاراتپاۋلارىن سۇرايمىز»، - دەدى ول.

ياۆۋز جەر سىلكىنىسىنەن كەيىن تەكسەرۋ جۇرگىزىلىپ جاتقانىن، قۇربان بولعاندار، جاراقات العاندار نەمەسە عيماراتتاردىڭ قيراۋى تۋرالى اقپارات بولماعانىن اتاپ ءوتتى.

سونىمەن بىرگە، قالا گۋبەرناتورى تۇرعىنداردى بۇرىن ەۆاكۋاتسيالانعان اپاتتى عيماراتتارعا جاقىنداماۋعا شاقىردى. ياۆۋز قاۋىپسىزدىك ماقساتىندا مەكتەپتەگى ساباقتاردىڭ ءبىر كۇنگە توقتاتىلعانىن ايتتى. بۇعان دەيىن حابارلاعانىمىزداي، جەرورتا تەڭىزىندە ماگنيتۋداسى 4,2 بال جەر سىلكىنىسى بولدى.

سونداي- اق، الماتىدا Mass Alert جەر سىلكىنىسىن ەسكەرتۋ جۇيەسى سىناقتان وتكىزىلەتىنى ايتىلدى.

اۆتور
ەركەجان سماعۇلوۆا