تۇركيانىڭ چەشمە كۋرورتىندا ورمان ءورتى تۇتاندى

استانا. KAZINFORM - تۇركيانىڭ ەگەي تەڭىزى جاعالاۋىندا، يزمير قالاسىنا قاراستى تانىمال چەشمە كۋرورتىندا ءىرى ورمان ءورتى باستالدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ءورت تاۋلى جانە ويلى جەرلەردە تەز تارالىپ، تۇرعىن ۇيلەر مەن تۋريستىك نىساندارعا جاقىنداعان.

جەرگىلىكتى بيلىكتىڭ مالىمەتىنشە، جالىن ورمان القابىنىڭ ەداۋىر بولىگىن شارپىعان. قاتتى جەل ءورتتىڭ ءارى قاراي تارالۋىنا ىقپال ەتىپ وتىر. قاۋىپ ايماعىندا ورنالاسقان ءۇش ەلدى مەكەننىڭ تۇرعىندارى ەۆاكۋاتسيالاندى.

تۇركيانىڭ ءورت ءسوندىرۋ جانە قۇتقارۋ قىزمەتتەرى ورتپەن بەلسەندى كۇرەس جۇرگىزىپ جاتىر. ونداعان ءورت ءسوندىرۋ كولىكتەرى، ارنايى تەحنيكا مەن تىكۇشاقتار، امفيبيالىق ۇشاقتار جۇمىلدىرىلعان. سونىمەن قاتار، جاندارمەريا قىزمەتكەرلەرى مەن ەرىكتىلەر دە كومەككە تارتىلعان.

كۋاگەرلەردىڭ ايتۋىنشا، ءتۇتىننىڭ قويۋ باعاندارى ونداعان شاقىرىمنان كورىنەدى، ال اۋادا كۇيىك ءيىسى قاتتى سەزىلەدى. ايماقتاعى تۋريستەرگە قاۋىپ تۋرالى ەسكەرتۋ جاسالدى، كەيبىر قوناق ۇيلەر جولاۋشىلاردى ءىشىنارا ەۆاكۋاتسيالاي باستادى.

ءورتتىڭ شىعۋ سەبەبى ازىرگە انىقتالعان جوق. بيلىك وكىلدەرى تابيعي دا، ادامي فاكتورلاردى دا قاراستىرىپ جاتىر. قازىرگى ۋاقىتتا ارنايى تەرگەۋ توپتارى وقيعا ورنىندا جۇمىس ىستەپ جاتىر.

تۇركيانىڭ ورمان جانە اۋىل شارۋاشىلىعى مينيسترلىگى ايماق تۇرعىندارى مەن قوناقتارىنا ساق بولۋدى، ءورت وشاقتارىنا جاقىنداماۋدى جانە رەسمي اقپارات كوزدەرىن مۇقيات باقىلاپ وتىرۋدى ەسكەرتتى.

جاعداي ءالى دە كۇردەلى. بيلىك ءورتتى ەلدى مەكەندەر مەن تۋريستىك نىساندارعا تارالماۋ ءۇشىن بار كۇشىن سالىپ جاتىر.

قازىرگى ۋاقىتتا «يزمير-چەشمە» اۆتوجولىنىڭ چەشمەگە باراتىن باعىتى - زەيتينلەر تولەم پۋنكتى ماڭىندا، ال يزميرگە باراتىن باعىتى - الاچاتى تولەم پۋنكتى ماڭىندا جابىلعان.

سونداي-اق، چەشمەنىڭ ەسكى جولىندا دا كولىك قوزعالىسىنا شەكتەۋ قويىلدى: چەشمەدەن ۋرلا باعىتىنا - كۋتلۋ اكتاش سۋ قويماسى ماڭىندا، ال ۋرلادان چەشمەگە - زەيتينلەر ايرىعى ماڭىندا كولىك جۇرىسىنە تىيىم سالىنعان.

تۇركيانىڭ ىشكى ىستەر ءمينيسترى الي ەرليكايانىڭ ايتۋىنشا، يزميردە ورمان ءورتى سالدارىنان 110 تۇرعىن ءۇي مەن 2 كوممەرتسيالىق نىسان قاتتى زاقىمدانعان. بيلەدجيكتە - 69 تۇرعىن ءۇي، 3 كوممەرتسيالىق نىسان، ال مانيسەدە - 5 تۇرعىن ءۇي زارداپ شەككەن.

- ءورت سالدارىنان تۇرعىن ءۇي، كوشۋ جانە مۇلىك شىعىندارىن وتەۋ ءۇشىن اتالعان وڭىرلەرگە جالپى سوماسى 21603400 تۇرىك ليراسى (شامامەن 550 مىڭ ا ق ش دوللارى) ءبولىندى، - دەدى مينيستر.

بۇعان دەيىن تۇركيانىڭ بىرنەشە وڭىرىندە ورمان ورتتەرى سوندىرىلگەنى حابارلانعان بولاتىن. الايدا اۋا تەمپەراتۋراسىنىڭ جوعارى بولۋىنا بايلانىستى ءورت قاۋپى ءالى دە ساقتالىپ وتىر.